Францускиот претседател Емануел Макрон ги повика САД и Европската Унија да ги укинат санкциите против Сирија во среда, откако го угости сирискиот лидер Ахмед ал-Шара во неговата прва посета на Европа.
Францускиот лидер рече дека Вашингтон треба „да побрза со укинување на санкциите“, да ги задржи трупите во Сирија, а потоа да ја разгледа ситуацијата подоцна.
„Интерес на сите, вклучително и на Американците, е денес да дејствуваат и да нè придружуваат во укинување на санкциите врз сирискиот народ“, рече Макрон на прес-конференција заедно со ал-Шара, пишува Политико.
Ал-Шара, поранешен член на Ал Каеда, беше претпазливо пречекан од меѓународната заедница откако неговите сили го соборија бруталниот сириски диктатор Башар Асад кон крајот на минатата година.
Тој вети дека ќе ги заштити малцинските групи во Сирија и дека ќе води поинклузивни политики. Но, секташкото насилство во последните месеци, вклучувајќи ги двата крвави дена во март, во кои безбедносните сили убија стотици цивили, предизвика стравувања дека ал-Шара не успева да ги заузда екстремистичките фракции во Сирија. Сирискиот лидер потоа вети дека ќе ги казни одговорните.
Во Париз, ал-Шара тврдеше дека „елементи на поранешниот режим [на Асад] ја искористија ситуацијата за повторно да ја разгорат војната… ние формиравме истражен комитет и комитет за помирување“.
Францускиот претседател, исто така, ја повика ЕУ да се држи до својата одлука за суспендирање на санкциите против Сирија. Во февруари Брисел ги укина ограничувањата во областите на енергетиката, транспортот и банкарството, но рокот во јуни за нивно разгледување брзо се приближува.
„Неколку сојузнички земји имаат двоумења, ние ќе работиме на отстранување на тие сомнежи“, рече Макрон.
Ал-Шара рече дека санкциите врз Дамаск биле воведени врз режимот на Асад и дека „ништо не го оправдува нивното продолжување“, пренесува Политико.
