Дечињата од Дневниот центар за деца од улица ќе бидат сместени во просториите на Здравствениот дом во Шуто Оризари, откако пред дваесеттина денови, целосно изгоре Дневниот центар и градинката „8 Април“.
„Министерствто за труд и социјална политика за Дневниот центар за деца на улица којшто беше опожарен заедно со градинката ‘8 Април’ во Шуто Оризари, обезбеди простории во Здравствениот дом во Шуто Оризари на чијашто адаптација веќе се работи. Нашите информации говорат дека во кус период, Центарот ќе профункционира и дечињата коишто го посетуваа, повторно ќе бидат згрижени и ќе ги извршуваат своите активности“, вели за ЦИВИЛ Медиа, Жаклина Величковска од МТСП.
Здружението за општествено економски просперитет – „Човекот пред сé“, вечерва, во кафебарот „Концепт 37“ со почеток од 20 часот, организира хуманитарна акција со цел да им помогне на дечињата од Дневниот центар за деца на улица – Шуто Оризари.
На настанот ќе биде поставена кутија за донации, ќе има тивка аукција на фотографии од познати македонски фотографи, што граѓан(к)ите ќе може да ги купат и со тоа, директно да донираат, како и со секоја купена пијалок. Граѓаните може да донесат донации: боенки, фломастери, боички, сликовници, детски книги, тетратки или останат школски прибор, како и хигиенски средства, кои во моментов, им се најпотребни на дечињата.
Дехран Муратов
