Администрацијата на Трамп препорача прекинување на финансирањето на САД за повеќе програми што истражуваат воени злосторства низ целиот свет, вклучувајќи ги и руските воени злосторства во Украина, пренесува Ројтерс во ексклузивна објава.
Од инаугурацијата на американскиот претседател Доналд Трамп во јануари, администрацијата воведе сеопфатни отпуштања и намалувања на буџетот, насочени кон странска помош, медиуми и федерални работници. Многу од намалувањата директно влијаеја на програмите што ѝ помагаат на Украина.
Канцеларијата за управување и буџет (OMB) на администрацијата на Трамп на 25 јуни препорача откажување на средствата за речиси дваесетина програми што истражуваат и бараат одговорност за воени злосторства, изјавија за Ројтерс два американски извори запознаени со ова прашање. Медиумот, исто така, разгледа внатрешни владини документи за да ги поткрепи своите тврдења.
Целните програми вклучуваат групи што истражуваат руски воени злосторства во Украина, како и злосторства во Мјанмар, Сирија, Ирак, Непал, Шри Ланка и Гамбија.
Три извори изјавија за Ројтерс дека во Украина работат повеќе програми што се наменети за прекин. Една од групите е Global Rights Compliance, која собира докази за руски воени злосторства низ целата земја, вклучувајќи тортура и сексуално насилство. Друга е „Легал екшн ворлдвајд“, организација за правна помош која ги поддржува напорите за гонење на осомничени обвинети за извршување воени злосторства во Украина.
Стејт департментот ќе има можност да поднесе жалба на препораката на ОМБ, иако двајца американски функционери изјавија за Ројтерс дека државниот секретар Марко Рубио веројатно нема да се залага за повеќето програми.
Рубио потенцијално би можел да се залага за зачувување на неколку клучни програми, како што се оние што ја поддржуваат гонењето на руските воени злосторства во Украина, рече еден извор.
Според интерна е-пошта на Стејт департментот што ја прегледал Ројтерс, одделот има рок до 11 јули да ги достави своите аргументи во име на зачувување на која било од целните програми за одговорност за воени злосторства.
Намалувањата на финансирањето од страна на администрацијата на Трамп веќе влијаеја на хуманитарната помош и програмите за граѓанското општество низ цела Украина, додека земјата се соочува со четвртата година од целосната инвазија на Русија. Еден од првите акти на Трамп во неговиот втор мандат беше да ја замрзне целата странска помош на САД за 90 дена. Потоа тој работеше заедно со поранешниот сојузник Елон Маск за да ја расформира Агенцијата на САД за меѓународен развој (УСАИД).
Меѓу организациите на кои им е одземено финансирањето е Опсерваторијата за конфликти во Украина, водечката иницијатива поддржана од САД за документирање на киднапирањето на украински деца од страна на Русија. Како дел од Лабораторијата за хуманитарни истражувања на Универзитетот Јеил, групата ќе ги прекине своите напори за следење и мониторинг на нелегално депортираните украински деца од 1 јули поради намалување на финансирањето.
Белата куќа претходно го распушти и Тимот за одговорност за воени злосторства на Министерството за правда на САД и го отпушти координаторот одговорен за собирање податоци за руските воени злосторства во Украина.
Д. Мишев
