Европа се повеќе е заситена од трговските закани на американскиот претседател Доналд Трамп и разгледува смел потег да се сврти кон Азиско-пацифичкиот регион во потрага по партнери кои сакаат да играат според воспоставените правила на меѓународната трговија, наведува бриселскиот портал „Политико“.
Како одговор на едностраните и произволни царини на Трамп, кои би можеле да се зголемат до 50 проценти од 9 јули доколку преговарачите на ЕУ и САД не постигнат трговски договор, претседателката на Европската комисија, Урсула фон дер Лајен, според порталот, планира да се здружи со земјите од Сеопфатниот и прогресивен договор за Транспацифичко партнерство (ЦПТПП), кој, меѓу другите, ги опфаќа и Австралија, Јапонија, Канада и Мексико, а од декември минатата година и Велика Британија.
– Заедно, 39-те земји од ЕУ и ЦПТПП сочинуваат 30 проценти од вкупната светска трговија. Формирањето коалиција на овие земји, тврдат нејзините поддржувачи, би можело да означи прв чекор кон преконфигурирање на меѓународниот трговски поредок и избегнување на институционалната парализа што ја зафаќа Светската трговска организација, наведува „Политико“.
Според извори во Европска комисија, за ваквата идеја Фон дер Лајен говорела и пред лидерите на ЕУ на Самитот во Брисел во четвртокот, при што посочила дека таквото здружување „би ги редизајнирало правилата на глобалната трговија, реформирајќи го или можеби дури и заменувајќи го телото за правила во глобалната трговија“.
Фон дер Лајен смета дека здружувањето на ЕУ и земјите од Транспацифичкото партнерство би покажало дека е можна слободна трговија заснована на правила меѓу повеќе држави.
Експерти сметаат дека оваа идеја не е невозможна, но дека земјите ќе треба да „дадат ветување“ дека ќе ги почитување на воспоставените правила на мултилатералната трговија и да ги одржуваат своите пазари отворени едни за други.
Според нив, ваквото здружување би испратило сигнал до Вашингтон дека многу значаен дел од глобалната економија, вклучувајќи ги речиси сите традиционално најблиски партнери на САД, остануваат посветени на трговскиот систем базиран на правила.
Инаку, САД беа меѓу потписниците на првичната верзија на Транспацифичкото партнерство во 2016 година, но се повлекоа од договорот за време на првиот мандат на Трамп во 2017 година.
Поранешениот главен трговски преговарач на ЕУ, Игнасио Гарсија Берсеро смета дека сепак ова потенцијалното партнерство меѓу ЕУ и ЦПТПП не треба „да им ја затвори вратата“ на Американците, ниту пак да се користи за да се антагонизира Трамп, пишува Политико.
– Сепак, ако САД не се подготвени да се приклучат затоа што не веруваат дека решение за проблемите се правилата, другите ќе мора да продолжат без САД, изјави Гарсија Берсеро за „Политико“.
Потписници на сегашната верзија на Сеопфатниот и прогресивен договор за Транспацифичко партнерство од јануари 2018 година се Австралија, Брунеи, Велика Британија, Виетнам, Јапонија, Канада, Малезија, Мексико, Нов Зеланд, Перу, Сингапур и Чиле. ЦПТПП стапи во сила на 30 декември 2018 година, пренесе МИА.
