Откако вчера беше отворен погон за производство на масло од канабис за медицински потреби, во кругот на поранешната фабрика ОХИС, денеска граѓанското здружение „Зелена алтернатива“ излезе со став во однос на новата странска инвестиција.
„Го поздравуваме отворањето на нова компанија за одгледување и производство на производи од канабис и сметаме дека може да придонесе за подобра конкурентност и намалување на цените на пазарот… Сепак, сметаме дека Македонија како земја може ова да го направи и сама, и без помош на странски инвестиции, кои според изјавите, ќе придонесат за вработувања, но сепак, се работи за странски фирми. Сметаме дека во Македонија има луѓе со знаење и капацитет за одгледување и производство на канабис и производи од канабис со висок квалитет кои ги задоволуваат сите стандарди“, се вели во нивното соопштение.
Од „Зелена алтернатива“ бараат „законодавците и институциите на Република Македонија да размислат за помагање на домашни производители, домашни фирми кои исто така, би имале производство од семе до готов производ, и освен вработувања, ќе придонесат и со внесување и обрт на финансиски капитал кој ќе остане во државата“.
„Мораме да истакнеме дека како здружение, не сме запознаени со оваа компанија и не сме ја сретнале на ниту еден познат светски саем за одгледувачи низ светот, ниту пак, сме сретнале производи произведени од истата, што за нас е зачудувачки со оглед на тоа дека сопствениците истакнуваат дека се меѓу најдобрите производители на медицински канабис во светот“, велат од граѓанското здружение загрижени за квалитетот со кој ќе се произведува канабисот во иднина.
Инаку, станува збор за нова странска инвестиција во Република Македонија на американска компанија NYSK холдинг ДОЕЛ Скопје. Вкупната инвестиција во период од пет години предвидено е да биде меѓу три до пет милиони долари.
