Велика Британија можеби веќе е во војна со Русија поради длабочината и интензитетот на сајбер нападите, саботажите и другите непријателски активности оркестрирани од Москва против Велика Британија, според поранешна шефица на МИ5, објави Гардијан.
Елиза Менингем-Булер, која ја водеше домашната шпионска агенција пред две децении, рече дека се согласува со коментарите дадени од експертот за Русија Фиона Хил, која тврдеше во интервју за Гардијан претходно оваа година дека Москва е во војна со западот.
Лејди Менингем-Булер тврдеше дека ситуацијата се променила „од инвазијата на Украина и разните работи за кои прочитав дека Русите ги прават тука – саботажи, собирање разузнавачки информации, напаѓање луѓе и така натаму“.
Зборувајќи во подкаст во кој беше интервјуирана од лорд-спикерот, Џон Мекфол, таа потоа се осврна на Хил, кој го советуваше Доналд Трамп за време на неговиот прв мандат како претседател на САД и коавтор на стратешкиот одбранбен преглед на Велика Британија, пишува Гардијан.
„Мислам дека можеби е во право кога вели дека веќе сме во војна со Русија. Тоа е поинаков вид војна, но непријателството, сајбер нападите, физичките напади, разузнавачката работа се обемни“, рече таа.
Шест Бугари кои живеат во Велика Британија беа затворени оваа година за нивната улога во шпионски круг кој вршеше непријателски надзор низ Европа, а петмина мажи беа осудени за нивна вмешаност во палеж нарачан од Москва врз магацин со залихи наменети за Украина.
Пет Мекфаден, тогашен министер во Кабинетот, минатата година изјави дека Русија ги засилила своите сајбер напади против Велика Британија. Хакерите нападнале низа британски бизниси. Иако може да потрае време за да се открие изворот на нападите, се сомнева дека многу од нив потекнуваат од Русија.
Д. Т.
