Лилјана Георгиевска од здружението „Унит“ од Куманово, позната како неформална лидерка на стечајните работници, изјави дека ветените од Владата – 7.596 денари, не се за потценување: „Тие се спас за стечајните работници, да можат да имаат за леб и за лекови“.
„Има голема смртност меѓу стечајните работници, не само во здружението УНИТ, туку низ целата земја, вклучувајќи ги и нерегистираните стечајци. Според евиденцијата, која ја имаме од Заводот за вработување, за жал, над 51% од стечајните работници се починати“, изјави Георгиевска за ЦИВИЛ Медиа.
Со новиот Предлог – Закон за материјално обезбедување на невработени лица поради приватизација на претпријатија со доминантна сопственост на државата, што го поднесе Владата, се предвидува 3.000 стечајни работници да бидат обештетени. Георгиевска го поздрави таквото решение, но истакна дека тука нема да застане борбата за стечајците. Имено, како што објасни таа, уште 1.000 стечајни работници остануваат со нерешен статус и по Нова година се очекува и нивно згрижување.
Околу 560 лица од Куманово се пријавиле во здружението на стечајни работници „Унит“ и доставиле евидентен лист за остварениот стаж во една од поранешните кумановски компании, за да ги користат поволностите од Предлог-законот.
„Не посакувам никој да се најде во ситуација на стечаец. Ова е геноцид на модерното време!“, изјави Георгиевска.
Законот за стечајци ги опфаќа невработените лица на кои им престанал работниот однос во претпријатија со доминантна сопственост на државата, по 1 јануари 1995 година, а заклучно со 31 декември 2016 година.
Невработените лица, исто така, треба да имаат 15 години стаж и 52 години (жени), односно 55 години (мажи) до стапувањето во сила на овој закон.
Текст и камера: Биљана Јордановска
