Денеска низ светот се одбележува 17 октомври – Меѓународниот ден за борба против сиромаштијата. Иако статистиките покажуваат дека во изминатите 20 години, стапката на смртност на деца под пет години, како резултат на сиромаштијата е преполовена, како и дека стапките на екстремна сиромаштија се, исто така, драстично намалени од 1990 година, сепак, бројките се поразувачки.
Иако светот произведува доволно храна за да ги нахрани сите жители, околу 800 милиони луѓе страдаат од глад. Тоа е еден од девет луѓе – од кои 60% се жени!
Годишно, повеќе луѓе умираат од глад, отколку од маларија, туберкулоза и СИДА.
Околу 45% од смртните случаи кај новороденчињата се поврзани со неисхранетост.
Една третина од храната произведена во светот се фрла како отпадок.
Светот ќе треба да произведе 60% повеќе храна до 2050 година, за да ја нахрани растечката популација.
Според Министерството за труд и социјална политика, во Македонија 21,5 отсто од населението живее во сиромаштија.
По повод одбележувањето на денешниот Меѓународен ден против сиромаштија, во Македонија се одржуваат неколку акции.
На пет локации во Скопје започна најмасовната акција за донирање на храна во Македонија, „Нахрани 1.000” во состав на иницијативата „Мрдни со прст“.
Во периодот од 10 до 19 часот, ќе бидат поставени штандови на плоштадот „Македонија“, пред „Скопје Сити мол“ кај „Плеј кафе“, пред „Веро“ во Аеродром, пред Домот на градежници и пред „Тинекс“ во Ѓорче Петров. На штандовите ќе може да се донира храна која ќе биде наменета за бездомниците и за загрозените семејства.
Организатори на настанот се граѓанската иницијатива „Мрдни со прст”, „Црвениот крст на Град Скопје”, организацијата „Ајде Македонија”, Здружението на граѓани за помош на бездомници и загрозени семејства „Љубезност”, Сојузот на извидници и организацијата „АДРА”.
Покрај штандовите, во акцијата ќе биде вклучено и комби возило на иницијативата „Мрдни со прст“, кое денеска ќе посети компании во Скопје, откако, како што соопштија организаторите, бизнис-секторот пројавил интерес за акцијата.