„2018 година се одбележа со потпишувањето на Договорот од Преспа и во тој дух помина и целата година, почетокот на оваа година го одбележа крајот на тој процес што треба да отвори перспективи за членство во НАТО и ЕУ и со тоа да ни се подобрат состојбите во општеството и животниот стандарт на граѓаните“, вели Александар Кржаловски од МЦМС во разговор за ЦИВИЛ Медиа за „Перспективи 2019“.
Според него, освен тој процес, сè останато беше во сенка, и дека очекувањата на граѓаните остануваат за остварување во 2019 година.
„Некако се губи надеж дека некои работи ќе се сменат бидејќи некои постапки се повторуваат и не ја гледаме промената што беше ветувана и очекувана од граѓаните кога се смени власта на ВМРО-ДПМНЕ, пред 2 години“, додава Кржаловски.
„Во однос на граѓанскиот сектор може да се констатира сепак многу поголема соработка и отвореност од оваа Влада и учеството е значително зголемено и конструктивно. Колку од придонесот на граѓанските организации се зема предвид е дискутабилно токму затоа што не се довршуваат процесите, сето она што требаше да биде направено не е или е во постапка или е одложено, допрва треба да ги видиме ефектите“, вели Кржаловски.
Кржаловски вели дека во 2019 година очекува да се уреди финансирањето на граѓанските организации бидејќи нивото на кое е сега, од државните средства, е прилично ниско во однос на соседните земји, а не пак со оние со ЕУ.
„За пример често ја зимаме Хрватска, кај нас ако вкупното финансирање е 5 милиони евра по сите основи и за сите граѓански организации, во Хрватска тоа е околу 230 милиони и тука треба да се направи посериозна реформа, не очекувам да стигнеме ни до половина од тоа, но очекувам во мандатот на оваа Влада очекувам да се реформира системот и да се зголеми значително финансирањето“, додава Кржаловски.
Според него, патот до Европската Унија е да ги превземеме работите во свои раце, а не да очекуваме странски донатори да ни ги решаваат проблемите.
Ангела Петровска
Камера и фотографија: Дехран Муратов
Монтажа: Ариан Мехмети
