Велигденските празници уште повеќе ја оладија предизборната атмосфера, особено во контекст на јавни настапи, собири и митинзи. Но, и она малку појавување во медиумите и на социјалните мрежи е сосема доволно за да се доловат неконзистентноста и небулозите на претседателските кандидати.
Па така претседателската кандидатка Гордана Силјановска Давкова, ги прозва своите колеги Албанци од времето кога таа беше министер во Владата да кажат каков човек и министер била таа. ЦИВИЛ Медиа се сети на еден од нив, поранешниот министер за финансии, од истиот период, Џевдет Хајредини.
Тој во интервјуто за ЦИВИЛ Медиа оваа прозивка на кандидатката за претседател ја нарече огромна грешка, наведувајќи ги сите причини поради кои таа нема право да се повика на своите колеги „Албанци“. Останатото е историја…
Во духот на Велики Петок, еден од најтешките и најтажните денови за Христијанството, Силјановска Давкова, отиде до таму што себе си се самопрогласи за маченичка, велејќи дека во моментот се чувствува како да го носи најтешкиот крст, затоа што е плукана и навредувана од сите оние на кои не им одговара демократска Македонија, каде има владеење на правото. „Помогнете ми да го однесам македонскиот крст за враќање на политиката во рамки на правото“, повика таа.
Од каде да почнеме? Од набројување на тоа кому се не му одговара владеење на правото во оваа земја? Од оние кои повеќе од 10 години го урнисуваа правниот систем во оваа држава, давајќи им легитимитет на сите криминали кои ете и денеска, две ипол години, по новата власт, се случуваат под превезот на „се е во рамките на законите“? Дали Силјановска ќе го препознае „Јуда“ во партијата која застана зад нејзината кандидатура, или, сепак, ќе ја прошета правдата со превез на очите?
Пендаровски, пак, реши својата порака на овој ден да ја упати од Марков Манастир, каде пригодно се фотографираше со своето семејство, повикувајќи на помирување, заедништво и благосостојба. И тоа е отприлика се.
Со ваква веќе сто пати видена и чуена реторика, глумење и самопрогласување за жртва или херој, сеедно, тешко дека ќе ги разбудат апатичните, резигнирани, индиферентни и разочарани граѓани…
Маја Ивановска
