Биљана Јордановска
Понеделнички и, најверојатно, празнично расположен, кандидатот за претседател Стево Пендаровски, ја искористи изборната кампања за вториот круг за делење ордени. Во Штип вети дека ќе воведе орден „Киро Глигоров“, а во Струмица орден „Борис Трајковски“, се разбира доколку граѓаните го изберат за претседател.
„Би сакал да најавам дека како ваш иден претседател, ќе иницирам воведување Орден „Киро Глигоров“ кој ќе се доделува на заслужни граѓани кои дале придонес кон мирот и безбедноста во државата“, изјави Пендаровски во Штип и „најавувам дека како иден претседател ќе иницирам воведување на орден кој ќе го носи името и на вториот претседател на Република Македонија – Орден „Борис Трајковски“. Овој орден ќе се доделува на граѓани кои имаат личен придонес во развојот на мултикултурното, демократско општество“, изјави тој во Струмица.
Пендаровски пред струмичани и штипјани ја изрази и својата гордост и чест што имал прилика да ги познава и двајцата поранешни претседатели.
Во Аеродром, пак, Пендаровски потсети дека очекува десет пати поголема разлика од првиот круг. Добро е жителите од оваа општина да знаат дека нема друго чаре за младите освен ЕУ и за сите останати НАТО.
„Другата понуда е враќање назад, изолација и уназадување. Гласот за Гордана е гласање за нов Иванов. Поддршката за Мицкоски е глас за враќање на Груевски. Знам зошто голем дел од граѓаните не излегоа на гласање во првиот круг, но сега треба да излезат заради иднината на државата, да не дозволиме враќање на диктатура и режим.“, рече Пендаровски.
Министерката за одбрана, Радмила Шекеринска, која го придружуваше Пендаровски во Аеродром, потсети на 5 мај 2015 година, кога пред седиштето на Владата и низ центарот на Скопје беа тепани и малтретирани демострантите кои побараа правда за убиство на Мартин Нешкоски.
Шекеринска повика дека кога ќе се излезе на гласање на 5 мај, да се има на ум еден поинаков 5 мај, кога се бараше разрешување на тогашната Влада, а Гордана Силјановска Давкова молчеше, истовремено кога студентите беа тепани и затворани.
„Каде беше Гордана Сиљановска кога нејзините студенти ги тепаа, каде беше кога нејзините колеги ги уценуваа? Каде беше кога ги слушавме бомбите и кога се кршеше правната држава? Тогаш молчеше. Каде беше кога телевизии се затвораа? Тогаш не молчеше, туку оправдуваше. Доцна е сега да се зборува за правна држава, кога 11 години ја одмолча најлошата власт и сите неправди“, рече Шекеринска.
Што се однесува, пак, до повиканата Силјановска, таа се пофали дека можела и за Албанец да се омажи и дека имала многу пријатели Албанци цел живот, таа не е албанофоб, напротив, таа секогаш на сите граѓани им се обраќа подеднакво…
На вчерашните средби во Кичево, Струга и Охрид, Силјановска не пропушти да одржи уште едно предавање за правната држава. Но, го искористи моментот и да повика на бојкот, но на власта, а не на гласовите што ќе си седат дома. Не. Силјановска повикува, гласајте, ама за мене и така ќе се стигне и до предвремени парламентарни избори. Нешто што сигурно ќе го израдува нејзиниот поддржувач, ВМРО-ДПМНЕ.
Христијан Мицкоски, од Петровец порача дека на 5 мај очекува победа на ВМРО-ДПМНЕ. Иако се работи за претседателски избори, Мицкоски е во филм на предвремени парламентарни избори. Како и да е, тој смета на гласовите на 5 мај како на гласови за неговата партија, веројатно и за да докажат дека она што било во минатото не се важи,а дека сегашната власт таа што е нечесна и се коцка со вистината.
Патот е еден, не дека не е, но останува да се види дали по тој пат граѓаните ќе одберат да чекорат заедно напред или ќе бара правда за татковината, на која ѝ треба мајка.
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста.
Повредата на авторските права е забранета со закон.
Врз основа на договор за соработка, оваа содржина е достапна за Плусинфо и Слободен печат без ограничувања.
