Претседателскиот кандидат Стево Пендаровски, веднаш по добивањето на поканата од дел од Шарените да одговорат на директни прашања од граѓанките и граѓаните одговори потврдно. Неговата ривалка, претседателската кандидатка Гордана Силјановска Давкова одбра да ја одбие поканата за соочување.
Стево Пендаровски во својот одговор на поканата од иницијативата кратко изјави:
Официјално ја прифаќам поканата за учество на јавниот настан организиран од На Мегдан / Në Mejdan. Очекувам детали за настанот, се гледаме!
Гордана Силјановска Давкова не ја прифати поканата со изјавата:
Крајно време е сите да се изборат за своето право, а не со полнење на кутии, не со семејно гласање. Верувам дека тие кои сум ги учела, ќе знаат за кого да гласаат. Јас знам што е револуција, но како одеднаш сега повторно се појави „Шарена револуција“… н верувам дека пратеници, советници, членови на управни одбори и носители на огромни проекти имаат легитимитет да се претставуваат како шарена револуција. Нивните ставови се исти како на мојот против кандидат, па мислам дека тој ги артикулира овие ставови. Ако сакате да бидете револуционер, сметам дека треба да бидете пристојно расотијание од власта. И оваа листа од луѓе што ја видов не сметам дека е репрезентативна за некој што се нарекува револуционер.
Иницијативата излезе со експресен одговор:
Разочарани сме од одбивањето на нашата покана од страна на Гордана Силјановска, бидејќи според неа иницијаторите не биле легитимни револуционери. За да биде хипокризијата комплетна, тоа го изјави додека добиваше јавна поддршка од наш поранешен соборец, сегашен претседател на политичка партија. Професорке, за легитимитетот на нашиот активизам можат да говорат луѓето кои ги делеа улиците со нас. Тие веќе го прават тоа и ние со задоволство дискутираме со нив на оваа тема. Но, тоа не е едно од прашањата кои се упатени кон Вас. Затоа, не ги избегнувајте нашите прашања и дојдете #НаМегдан. Граѓаните имаат сериозни прашања за Вас и Вашата програма, кои сте должни да ги одговорите доколку очекувате нивна поддршка. Се надеваме дека ќе најдете време за тоа во Вашата агенда.
ЦИВИЛ – Центар за слобода со внимание ги следи изјавите во врска со оваа иницијатива што се во контекст и на изборниот мониторинг. Ставот на организацијата е:
Секогаш постои потреба од директна комуникација меѓу гласачите и кандидатите, особено во контекст на граѓанскиот активизам и демократските процеси во земјата. Оваа и ваквите иницијативи отвораат креативни комуникациски канали за граѓанско учество во изборниот процес, надвор од сценаријата на партиските тимови за односи со јавноста. Сметаме дека треба да се продолжи со поставување на прашањата, а ќе биде доблесно политичарите да одговорат на тие прашања.
ЦИВИЛ Тим за комуникации
