На само два дена од завршувањето на изборната кампања, наместо остварување на очекуваното, дека кампањите на двајцата кандидати за претседател на државата ќе се заострат, дека конечно ќе излезат со конкретни предлози и решенија, и понатаму се водат бледи, разочарувачки и досадни кампањи. Се чини како целта да е цел да ги повикаат граѓаните да си останат дома, наместо да ги поттикнат и охрабрат да излезат да гласаат.
„Било што било во првиот круг. Мораме да сфатиме дека ова ни е единствената шанса да останеме на патот кон НАТО и ЕУ“, изјави вчера во Штип, кандидатот за претседател, Стево Пендаровски, осврнувајќи се на лошата излезност и слабиот резултат, како небаре, ете, им простил на гласачите што не излегле и не го гласале, ама нејсе, сега е време да станеме сериозни.
Единствениот пат кон НАТО и ЕУ е воспоставување на здрав правосуден систем, независен од дневно-политичките случувања, спроведувањето на реформите, справувањето со корупцијата. И наместо да говориме за овие работи, на јавните настапи на Пендаровски се уште се зборувам за минатиот режим, за препукувањата меѓу лидерите на двете најголеми политички партии и најави за некакви метли. Но и метлите во овој случај се поделени и селективни. Па така имаме најави за „чистка“ само во редовите на СДСМ, но не и на ДУИ. Вечниот коалиционен партнер на секоја власт во земјата, чии гласачи неуморно го цицаат државниот буџет, и никој се уште не одговара за тоа. Можеби оттука и храброста на Изет Меџити да вети дека на Пендаровски во овој круг ќе му донесат 80.000 гласа.
Ништо подобра во своите настапи не е ниту Гордана Силјановска Давкова. Професорката не изостанува во секој свој настап да се повика на нејзиното знаење, вештини и мудрост, космополитизам, љубов кон сите вери и нации, хуманост, принципиелност, Јателе и Тителе, Мирко и Славко…
Вчерашниот празничен ден таа реши да го помине со семејството и поблискиот тим на соработници во една винарија, заборавајќи која е целта на први мај. Денот го искористи да им упати критика и на оние кои негодуваа околу нејзиниот „хуман“ подвиг делејќи им оброци на децата во СОС Детско село. Останува непознато како и зошто професорката со толку искуство и знаење, поборник за правда и права, не може да го препознае злочинот, особено со оглед на фактот дека никогаш претходно во јавноста не била позната по учество во хуманитарни настани. Бласфемијата од фотографии и историјатот на нејзиното животно искуство во контекст на соживотот со припадниците на различни етнички заедници доволно зборува за себе.
Единствената светла точка на денот е најавата на политичката партија Беса, која го поддржа кандидатот за претседател Блерим Река, кој отпадна во првиот круг, дека немаат намера да се мешаат во одлуките на граѓаните, дека нема јавно да поддржат ниту еден од кандидатите и дека ќе ги остават гласачите сами да донесат одлука.
И не, за жал, не е ова една епизода од нискобуџетна сапунска серија со сомнително потекло. Ова е реалната кампања на претседателските избори 2019 во Република Северна Македонија… Уште два дена…
Маја Ивановска