Околу 500 домаќинства во селото Арачиново маки мачат за да обезбедат вода за пиење! Во овие пеколни горештини, во селото има само една чешма од каде тече здравствено-исправна вода за пиење. Малите деца во колони чекаат во ред, полнат вода во шишиња и пластични садови, па ги носат во своите домови. Целата енергија на жителите е насочена кон обезбедување вода, со цел да ја зачуваат хигиената во домот.
„Копаме бунари, немаме избор. Како поинаку да ја одржуваме хигиената во куќите, лето е, ние живееме во село. И овој проблем не е од вчера, трае со години, но освен ветувања, решение нема“, реагираат жителите.
Оние кои се во можност, копаат бунари, но има и такви, кои од разни причини не можат да ископаат бунар во дворот, па полнат вода од кај соседите. Има жители коишто направиле и домашни резервоари во вода, што им е потребна за домаќинството, но која што сепак, не може да се користи за пиење.
За овој акутен проблем побаравме одговор од Општина Арачиново.
„И градоначалникот и директорот на комуналното претпријатие се на терен и нема да се вратат на работа. Никој нема во Општината, сите се на одмор, ќе се вратат по една недела!“, изјави вработен во Општината.
Дали навистина локалната власта на Општина Арачиново летува, додека жителите на истоименото село маки мачат за да се справат со проблемите? Или, ова е еден од начините на локалната власт за комуникација со медиумите, со цел – да се избегне конкретен одговор за причините за со години нерешениот проблем?
Ова е прашање за анализа. Како и да е, мештаните велат дека се ближат локалните избори и дека на избори, ќе го искажат своето задоволство од работата на досегашната локална гарнитура.
М. Т.
