На 28 април, сабота, се одбележува иницијативата Pay it forward – Продолжи понатаму, една од најголемите глобални хуманитарни акции која е проширена во 85 земји во светот. Во Македонија оваа акција се спроведува втора година во организација на женската хуманитарна организација Inner Wheel Club – Skopje Europea.
По тој повод разговаравме со Маја Бабиќ една од организаторките на овој настан.
„Продолжи понатаму“ е оригинална идеја на едно десетгодишно дете. Неверојатна, па дури можеби и утопистичка идеја, но ние веруваме дека и не мора да биде утопистичка. Се работи за тоа дека едно десетгодишно дете сака да го промени светот со тоа што ќе направи три добри дела за непознати или познати луѓе и за возврат, што е невообичаено кога правите добро дело, тој бара тие приматели на добрите дела да направат уште три добри дела. Според некаква математичка прогресија се верува дека тоа може да се рашири не само во квартот, не само во населбата, или градот, туку и низ целиот свет“, вели Бабиќ.
Од оваа идеја во 2007 година произлегува иницијативата за светски ден, односно 28 април. Се шири молскавично низ светот. Од 2017 година и Македонија е дел од оваа иницијатива.
„Годинава имаме неверојатен број на компании кои ни се придружуваат за да помогнат во смисла на ширење на идејата. Обично ние бараме компании, пари, спонзори, донации, но овој пат велиме: ‘Ширете ја идејата’. Станува збор за сериозни компании коишто се општествено одговорни преку целата година, но овој пат се навистина мотивирани да направат нешто.
Зад идејата на оваа иницијатива се појавува една картичка која веќе почнува да се шири меѓу луѓето. На картичката стои: „Честитки! Добивте ‘Pay it forward’ картичка. Тоа значи дека некој направил добро дело за вас и не бара ништо за возврат. Сега е на ред на вас да направите добро дело за некого и да му ја дадете оваа картичка“.
Настанот кој ќе се одржи во сабота се совпаѓа со уште еден настан на истото место, а тоа е настанот „Да растеме заедно“ кој е посветен на децата со аутизам.
„Идејата беше да направиме настан во Градскиот парк, каде што ќе ги замолиме нашите сограѓани да направиме еден масовен голем пикник на кој што ќе се дружиме и ќе ја шириме добрината и тогаш дојдовме до информација дека уште една организација и уште еден настан се случува на истото место. Нормално, како нетипични Македонци наместо да правиме настан 10 метри подолу и да бидеме конкуренција еден на друг, ние се слушнавме со организаторите на овој настан и буквално за 5 минути сфативме дека пораките и идеите ни се исти. Не ни требаше да се договараме дека треба да се споиме. Ја шириме идејата за аутизмот, ја шириме идејата за емпатија и добрина и сите заедно велиме: ‘Продолжи понатаму’!“, истакна Бабиќ.
Разговорот го води: Војо Цветановски
Обработка на текст: Маја Ивановска
Монтажа: Ермин Климента
Фотографија: Маја Ивановска
Камера: Дехран Муратов
