Новинарот на авганистанскиот информативен канал „Толо њуз“ , Зиар Кан Јаад, изјавил дека вршителот на должност министер за образование најавил дека момчињата и девојките веќе нема да можат да учат заедно на универзитетите „и ќе продолжат да учат во посебни класови во согласност со Исламскиот закон, пренесува Би-Би-Си.
И независниот новинар Башир Ахмад Гвах објави на Твитер дека талибанскиот министер за високо образование официјално им забранил на мажите да предаваат на жени.
Групата за заштита на човекови права „Талибан Воч“ на Твитер информира дека минатата недела сопствениците на приватни универзитети се спротивставиле на наредбата на талибанците за раздвојување на девојчињата од момчињата и на состанокот му рекле на гувернерот дека нема доволно учителки.
Но, гувернерот рече дека универзитетите треба да се прилагодат согласно шеријатскиот закон, додаваат од групата.
