ЦИВИЛ Медиа разговараше со Љуми Бекири, граѓански активист, кој, и самиот изненаден, доби казна од 100 евра за учество во герила акцијата на #Протестирам во 2015, на театарската претстава. Казната доаѓа со задоцнување од три години, а по пријава на тогашната директорка на Театар Комедија, Јелена Жугиќ.
Бекири и активистката Ирена Стеријовска, сега за сега, се единствените што добиле вакво решение и најверојатно ќе се жалат по пресудата.
„Ние не очекувавме вакво решение поради тоа што во 2015 година бевме поканети во полиција за истиот настан. Тогаш дадовме исказ и приложивме докази, односно со нас дојдоа и претставници на медиумите којшто беа присутни на герила акцијата и ја снимаа. од снимките се гледа дека не се случило ништо од тоа што го навела Жугиќ, однсно викање и рушење на јавниот ред и мир“, вели Бекири објаснувајќи дека герила акцијата била знак на протест против партизираната уметност.
„Изненадени сме од Министерството за внатрешни работи и од ваквото решение. Ова го сметаме за напад, не само врз нас лично, туку за напад врз целиот граѓански активизам… Колку и да изнесува сумата на казната, самиот чин на казнување претставува проблем кај мене бидејќи не можат да се казнуваат луѓе поради активизам или протест кој е уставно загарантирано право… Најверојатно ќе се жалиме со Ирена Стеријовска, но одлуката ќе ја донесеме по консултација со нашиот адвокат“, изјави Бекири.
Остра критика Бекири упати и до МВР, но и до сите институции, за кои смета дека час поскоро треба да се исчистат од непрофесионалните партиски кадри.
„Проблематично е ова решение на МВР бидејќи ние се казнуваме за активизам, додека, личноста што не пријави, Јелена Жугиќ учествуваше во случувањата на 27 април во Собранието, кои се оценија како обид за тероризам, е на слобода“, објасни Бекири.
Биљана Јордановска
