пишува: ПЕТРИТ САРАЧИНИ
Во македонскиот интернет простор имате десетици портали кои секојдневно објавуваат по над 100 содржини. А освен неколку редакции кои бројат над 10 новинари во кои просечно 1 новинар/уредник објавува по 10 содржини дневно, а некаде и повеќе (замислете го квалитетот во таа хипер-продукција), најголем број од овие портали имаат по пар луѓе, но исто така објавуваат десетици содржини дневно. Како е тоа возможно?
Главно се тоа „бесплатни“ содржини, туѓ авторски труд, украдени текстови, видеа, фотографии, ФБ и Твитер статуси… Настрана „соработката“ или оркестрацијата со „преземањето“ содржини за политика и „дуинг бизнис“, чијшто типичен пример е дејствувањето на машинеријата на мвро-вмро низ годините, а и денес.
Зошто им е битен тој квантитет? Што повеќе содржини објавуваш, тоа си порелевантен за алгоритмите на пребарувачите, агрегаторите, социјалните мрежи… Повидлив, „погоре“, значи почитан. А секако со помош на лајкувањето и на споделувањето на фабриките на партиски тролови, уште поблиску до можноста да манипулираш со јавното мислење.
Да се вратам на почетокот. Ајде, за сериозните редакции знаеме: освен новинарите, плаќаат агенциски вести, текстови, тешко е да се постигне тој квантитет (и брзина) за да се биде конкурентен онлајн, особено за новинарите, но очигледно изводливо..Но, како е можно човек-портал или редакција со пар луѓе да произведува толку содржини дневно?
Младиќот ви раскажа, со кражба на туѓ труд, што е нелегално одамна, во секоја нормална земја. Тоа е „подлогата“, ветерот во грб за тие платформи и нивната видливост, кои на тоа налепуваат секакви лаги и дезинформации. Лесни за жвакање, кликање… Вистинските вести и медиуми немаат шанси во борба со нив.
Со тоа, тие не само што го рушат и манипулираат јавното мислење, туку ги подриваат и сите сериозни медиумски бизниси што вложуваат пари за да ангажираат новинари, сниматели, фотографи, монтажери… Секако, ги подриваат сите автори, кои поради вакви лопови остануваат без леб и мора да го продаваат својот труд поевтино.
Сакаме ли веднаш да воведеме малку повеќе ред во светот на информациите? Да почнеме со стриктното почитување на авторските права, за тоа веќе има закон. Ви гарантира младиќот, само со негова примена, за што и онака треба сериозно да запнеме ако сакаме во Европа, ќе се проретчи многу какофонијава од секакви папагалски повторувани глупости. Ќе бидат среќни и сериозните медиуми кои плаќаат вистински новинари и вложуваат легални пари, ќе бидат среќни и граѓаните и јавноста, а богами и институциите. Некој ќе биде несреќен, а сите знаеме кој.
Или пак, ако веќе мора да нѐ трујат секакви портали, нека вработат луѓе барем, нека вложат барем малку повеќе пари, нека бидат тоа оригинални глупости, малку ли имаме таленти…
Преземање на содржините e ЗАБРАНЕТО (!!!), освен со писмена дозвола од ЦИВИЛ и тоа исклучиво според Условите за користење, авторски права и заштита на приватноста. Повредата на авторските права е забранета со закон. Врз основа на договор за соработка, оваа содржина е достапна за Плусинфо и Слободен печат без ограничувања.