Општина Арачиново се наоѓа северозападно од Скопје, на околу 220 метри надморска височина. Оддалечена е околу 12 километри од главниот град. Се смета за една од најмалите општини во Република Македонија и опфаќа вкупно 30 километри квадратни. Општината е формирана во 1996 година и е составена од четири населени места: Арачиново, Орланце, Грушино и Мојанце.
Во каква состојба ја затекнавте општина Арачиново, односно во какви финансиски, кадровски и просторни услови и кои се реалните проблеми на локалната самоуправа?
– Општина Арачиново има голем долг од околу 27 милиони денари. Тоа за нашата општина е премногу бидејќи нашите оперативни трошоци на годишно ниво се скоро половина од овој долг. Општина Арачиново е сместена во стара барака која беше наменета за месна заедница и е од 70-тите години од минатиот век. Со нашето доаѓање се потрудивме и направивме реконструкција на постоечките канцеларии. Добивме и проект за изградба на општинска зграда и очекуваме до крајот на оваа година таа да се изгради.
Поради немање доволно простор во моментов и конкретна стратегија од претходните градоначалници, недостига кадар кој ќе им обезбеди квалитетни услуги на жителите. Во општината немаме одделни сектори и со новата општинска зграда предвидуваме да има нови кадровски решенија за кои постепено ќе се одлучува, во транспарентен и соодветен процес.
Наша цел за хумани капацитети во општината е соодветно екипирање на целата општина и вработување на квалитетен и професионален кадар кој ќе биде во служба на граѓаните, вели градоначалничката Mиликије Халими.
Каква е состојбата во општината во моментов и што е преземено откако сте на функцијата градоначалник?
– Годинава се предвидува да продолжат неколку проекти, како што се канализација, изградба на прва градинка во селото Арачиново, изградба на општинска зграда, решавање на проблемите со дивата депонијата во атарот на општина Арачиново. Ќе се работи на подобрување на условите во училиштата, односно реконструкција на веќе постоечките основни училишта и изградба на барем две нови подрачни основни училишта за учениците од прво до петто одделение.
Нашата цел е да работиме на подобрување на животот на граѓаните. Во моментов почнавме со делумна изградба на канализацијата, како капитален проект, но постои уште многу за да се заокружи целиот проект. Верувам дека за мојот мандат ќе успееме да го заокружиме овој проект.
За дивата депонија, која повеќе години е проблем во општината, ќе има регионално решение, што значи дека неколку од општините од еден регион ќе создадат заедничка депонија. Ова е стратегија на Министерството за животна средина и просторно планирање, а ние како општини сме дел од овој процес.
Очекуваме дополнителни активности за да се подобри мрежата за водоснабдување. Треба да нагласам дека наследивме јавно претпријатије за водовод во рамки на општината, кое е нефункционално и тотално неоперативно, со многу долгови. Во моментот се трудиме да ја стабилизираме оваа состојба со цел во наредниот период да имаме конкретно решение со водоводот. Веќе сме на финални разговори со странска компанија и веруваме дека многу брзо ќе имаме и конкретен договор. За таа цел, на странскиот инвеститор треба да му обезбедиме место за изградба на фабриката. Во процес на разговори сме со Министерството за транспорт и врски за да најдеме соодветна локација за странскиот инвестотор бидејќи општината не управува во моментов со ниту една парцела на земјиште. Иако земјиштето е во атарот на општина Арачиново, тоа и припаѓа на Република Мекедонија, нагласи Халими.
Кои се вашите приоритети како градоначалник на општина Арачиново и идни проекти кои треба да се реализираат?
– Имаме неколку проекти како приоритети, според прграмата со која победивме на последните локални избори. Скоро сите проекти кои претходно ги споменав се приоритетни и ќе се имплементираат со различна диманика, во зависност од тежината и финансиската конструкција на проектот.
Нашите приоритети се во делот на инфраструктура, образование, вработување, транспарентна општина, како и подобрување на здравството за жителите на нашата општина. Економските цели исто така ни се приоритет, особено вработувањето на младата популација во општина Арачиново, посочи Халими.
Магдалена Ристоманов