COVID-19 е тест за општествата, владите, заедниците и поединците. Сега е време за солидарност и соработка во справување со вирусот, и за да се ублажат ефектите, често ненамерни, на мерките дизајнирани за спречување на ширењето на новиот коронавирус што ја предизвикува болеста COVID-19, порачуваат од Обединетите нации.
Почитувањето за човековите права ширум спектрумот, вклучително економските и социјалните права, како и граѓанските и политичките права, ќе биде фундаментално за успехот на одговорот на јавното здравство.
„Заеднички поминуваме низ најсериозната и најпроширената здравствена криза, жив спомен дека пандемијата на COVID-19 е тест за сите нас и за нашите општества и системи. За да излеземе од неа посилни, треба да останеме дома, да ги преземеме заштитните мерки, да покажеме солидарност. За да бидат најефикасни, мерките за спречување на ширењето на вирусот треба да вклучуваат активности за заштита на најранливите. Оваа пандемија е исто така тест за нашите принципи и заедничка хуманост. Сведоците сме на бран на стигматизација и дискриминација што се храни со дезинформации и страв. Како и COVID-19, расизмот и ксенофобијата се исто така заразни убијци. Сите ние, особено политичките лидери и други влијателни фигури, мора гласно да проговориме против стигмата и омразата генерирани од оваа криза. Токму во време на криза, темелните вредности на човековите права можат да ни помогнат да се насочиме кон најдобриот курс. Треба да се обединиме и да работиме заедно за општото добро со увереност и решителност“, порачува Мишел Башеле, високата комесарка на Обединетите нации за човекови права, во видеото објавено од нејзината канцеларија.
