Медицинските стручњаци од Институтот за јавно здравје во Скопје се категорични во ставот дека Законот за забрана на пушење на јавни простории, не треба да се менува! За нив се целосно неприфатливи најавените измени во досегашната регулатива, која што велат не се почитувала ни во државните институции!
„Тој Закон е добро направен, но не се почитува. Зашто, и во Министерството за здравство се пуши! Значи, тоа е институција којашто треба најмногу да се грижи за тој Закон, а таму не се применува, за жал. Да остане овој Закон, ама да се почитува!“, порачува примариус д-р Благоја Алексоски, од Институтот за јавно здравје во Скопје.
Граѓанските активисти пак даваат можност за имплементација на одредени измени во досегашната регулатива. Но, истакнуваат дека измените ни случајно, не смеат да бидат на штета и да претставуваат закана за здравјето на непушачите.
„Што се однесува до предлогот за измени на Законот за забрана на пушење, сметам дека во никој случај не смее да се дозволи пушење во локалите. Сметам дека треба да се воведе законска регулатива, локалите и кафеаните за пушачи да имаат соодветна вентилациска опрема, каде што ќе понудат простор за пушачи. Онаму пак, каде што се служи храна, ќе бидам поригорозен, воопшто да не се пуши! Затоа што, и како пушач, искуството покажува дека онаму каде што се служи храна, подобро е да не се пуши, зашто се дискриминираат и непушачите“, вели Илија Балтовски, граѓански активист од НВО „За нас се работи“ од Битола, којшто во исто време е и кафеанџија.
Инаку, Македонија во светот е на трето место според бројот на испушени (2.700) цигари по жител, годишно. А, медицинските стручњаци истакнуваат дека расте бројот на пушачи! Кога на оваа слика ќе се додаде и огромниот еколошки проблем со аерозагадувањето насекаде низ државата, од којшто пак годишно, според анализите, заболуваат по 1.300 граѓани од рак на бели дробови само во Скопје, тогаш предлагачите на измените на Законот, очигледно треба сериозно да размислат, пред да преземат каков било чекор натаму.
Моника Талеска