На 30-та седница на Државната комисија за спречување на корупцијата беа разгледани повеќе прашања во врска со постапувањето на комисијата.
Во врска со предметот кој ДКСК го отвори по сопствена инцијатива по наводи изнесени во медиуми и сомневање за злоупотреби и незаконитости поврзани со продажбата на парцелата за објект што ќе се гради кај паркингот спроти Холидеј Ин во центарот на Скопје и по предмет оформен по пријава во која се содржани наводи за одредени неправилности при водење на постапката за денационализација која се однесува на спорни катастарски парцели во општина Центар, ДКСК констатира:
1. Продажбата на парцелата ја извршило МТВ врз основа на извод од ДУП кој не се применува согласно Одлука донесена од Советот на општина Центар за запирање на спроведувањето на деталните урбанистички планови. Изводот од планот го издал Градоначалникот на општината, за наводно решавање на имотно правни односи иако во барањето од подносителот е наведено дека Изводот од ДУП-от е потребен за дооформување на парцела. Изводот издаден од Градоначалникот не содржи известување/ напомена дека ДУП от за кој се издава изводот е под мораториум и може да претрпи измени при негова ревизија.
2. Државниот правобранител доставил Мислење до МТВ во кое наведува дека нема правни пречки за продажба на земјиштето. Во дописот до ДКСК, ДП истакнува дека градежното земјиште е отуѓено врз основа на важечки ДУП од 2012 година и укажува дека како прилог кон документацијата доставена со барањето е и Изводот од ДУП от издаден од Градоначалникот на општина Центар.
3. Дел од земјиштето што го продава МТВ, 625м2 е на семејство што започнало процес на денационализација во 2003 година. Но поради измени во Законот за денационализација од дек 2010 год (Сл. Весник 72/10) според кои се дозволува располагање со имот што е предмет на денационализација, земјиштето е продадено пред да биде завршен процесот на денационализација. Пред оваа измена постоела апсолутна забрана за располагање со имотот предмет на денационализација без никакви дополнителни услови, со што се заштитувал имотот предмет на денационализација, правата на поранешните сопственици или нивни наследници врз тој имот и се овозможувало остварување на целта на законот – враќање на имотот на сопствениците/наследниците.
Наведената измена не е во согласност со Уставот на РМ, според кој граѓаните се еднакви пред Уставот и законите, а правото на сопственост е една од темелните вредности на уставниот поредок. Поради тоа ДКСК ги предлага следниве мерки:
1. Оценка на уставноста на член 64 од Законот за денационализација.
2. Поради фактот што земјиштето е продадено во време на мораториум кога ДУП се ревидира и може да претрпи измени и постои реален ризик од влијанија на сопствениците на тоа земјиште врз натамошната постапка на ревидирање и донесување на ДУП от од страна Советот на општината, ДКСК укажува дека Градоначалникот и Советот на општина Центар треба да се придржуваат на стандардите и нормативите со кои се обезбедува зголемување на степенот на хуманоста на живеењето, подобрување на условите преку плански одредби кои воведуваат повисоки стандарди во однос на постојната состојба или во однос на претходниот урбанистички план, хармонизација и хуманизација на просторот со плански одредби кои ќе ја штитат и стимулираат приватната сопственост, но на начин кој нема да го повреди јавниот интерес.
3. Со оглед на големиот интерес на јавноста и сензибилноста на ова прашање, ДКСК ќе покрене иницијативи за преоценка на законските решенија со помош на кои се овозможува системска/законска корупција и ќе ја следи судбината на оваа парцела со решенијата што ќе бидат предложени во ДУП-от.
ДКСК постапувајќи по предмети во врска со бесправно изградените објекти на Охридско-Струшкото крајбрежје ја повикува Владата на Република Северна Македонија да ги преземе сите активности за одземање на надлежностите на сите општини за уривање на бесправно изградените објекти во регионот под заштита на УНЕСКО.
Во однос на постапувањето по предмет во врска со неправилности во работењето на директорот на ЈП за стопанисување со спортски објекти, ДКСК одлучи да поднесе иницијатива до Владата на Република Северна Македонија за утврдување на одговорност на директорот.
Имајќи ја предвид содржината на добиените документи ДКСК оцени дека има елементи за основи за сомневање за злоупотреба на службената положба и овластување од страна на именуваниот директор за што до надлежното јавно обвинителство ќе поднесе иницијатива за кривична одговорност.
ДКСК одлучи да постапува по сопствена иницијатива врз основа на наводи во медиумите за ангажирањето на поедини нотари за потпишување на нотарските акти во врска со одобрени апликации од првата бескаматна кредитна линија КОВИД -1 од страна на Развојната Банка на Република Северна Македонија.
По добиени информации за поранешниот директор на Фондот за здравствено осигурување Ден Дончев, за примање на средства додека ја вршел јавната функција Државната комисија за спречување на корупцијата одлучи да постапува согласно своите законски надлежности.
Државната комисија за спречување на корупцијата (ДКСК) ги анализираше информациите кои надлежните институции ги доставија во врска со донациите и странската помош за справување со пандемија со COVID-19 и договори состанок со Инспекцискиот Совет со цел натамошно постапување.
