Претседателот на САД, Доналд Трамп, го повика претседателот на Федералните резерви веднаш да поднесе оставка, што е ескалација на неговите напади врз Џером Пауел, пренесува Би-би-си.
„Премногу доцна“, да си поднесе оставка веднаш!!!“, напиша Трамп во објава на неговата платформа Truth Social.
Тој, исто така, вклучи линк до вест за американскиот федерален регулатор за домување, кој бара Пауел да биде испитан поради неговото сведочење за реновирањето на седиштето на централната банка во Вашингтон.
Трамп го номинираше Пауел за претседател на Федералните резерви за време на неговиот прв мандат. Оттогаш, тој постојано го критикуваше за тоа што не ги намали каматните стапки, но не е јасно дали претседателот има овластување да го отстрани од функцијата.
И покрај континуираните критики на претседателот кон Пауел, тој претходно оваа година изјави дека „нема намера да го отпушти“.
Трамп сака Федералните резерви да ги намалат каматните стапки за да помогнат во зголемувањето на економскиот раст.
Пауел во вторникот изјави дека Федералните резерви досега ќе ги намалеја стапките да не беше влијанието на царинските политики на Трамп.
Кога за време на состанокот на централните банкари во Португалија беше прашан дали американските каматни стапки повторно ќе беа намалени оваа година доколку администрацијата не го објави својот план за нагло зголемување на царините за земјите од целиот свет, Пауел одговори: „Мислам дека е така“.
Федералните резерви на САД одбија да коментираат за забелешките на Трамп кога беа контактирани од Би-Би-Си.
Пауел беше повторно номиниран на позицијата од тогашниот претседател Џо Бајден, а неговиот сегашен мандат треба да заврши во мај 2026 година.
Пред враќањето на Трамп на власт на почетокот на оваа година, Пауел рече дека нема да се повлече доколку претседателот го замоли тоа и дека „не е дозволено според законот“ Белата куќа да го принуди да се повлече.
Членовите на одборите на независни федерални агенции како Федералните резерви можат да бидат принудени да се повлечат само пред да им истечат мандатите „со причина“, според значајната одлука на Врховниот суд на САД од 1935 година.
Сепак, Трамп честопати ги оспоруваше политичките норми, вклучително и отпуштањето на некои независни регулатори, дејствија кои беа оспорени на суд.
Минатата недела, Пауел му рече на Сенатот дека извештаите за зголемените трошоци и скапите функции во седиштето на Федералните резерви се „погрешни и неточни во многу, многу аспекти“.
Д. Мишев
