Европската унија бара Косово да не ги затвора српските центри кои даваат социјални услуги. Брисел вели дека статусот на објектите на Србија во северно Косово, кои обезбедуваат социјални услуги, треба да се реши во дијалогот што го олеснува блокот.
Ова го изјави портпаролот на Европската комисија на прашањето за затворањето на четири објекти на Центарот за социјална работа во Северна Митровица, кој работеше по српски систем, од страна на косовската полиција на 21 февруари.
Косовските власти соопштија дека во затворените објекти биле извршени „незаконски дејствија поврзани со изборниот процес“.
ЕУ соопшти дека е запознаена со операцијата спроведена од страна на косовската полиција и нејзината мисија за владеење на правото на Косово, ЕУЛЕКС, ја следи ситуацијата и Брисел чека „повеќе детали за утврдување на фактите“.
„Како што кажавме во минатото, статусот на овие структури и служби поддржани од Србија се очекува да се реши преку дијалог олеснет од ЕУ. Не треба да се затворат ниту здравствените и образовните институции поддржани од Србија, ниту другите структури поддржани од Србија кои даваат основни социјални услуги“, се вели во одговорот на портпаролот на ЕК.
Косовската полиција вчера спроведе акција во неколку нелегални канцеларии на Центарот за социјална работа на северот на Митровица.
Ова го потврди заменик директорот на полицијата за Северна Митровица, Ветон Елшани, кој за косовските медиуми изјави дека оваа акција е поврзана со апсењата кои биле извршени само еден ден пред изборите во Косово.
Според него, во канцелариите на центарот за социјални работи, кој бил паралелна/незаконска структура, имало сомневање дека телефонски им се јавувале на различни граѓани и во форма на закани ги принудувале или ги упатувале како да гласаат, условувајќи ја социјалната помош со нивниот глас во корист на одредена политичка партија која се натпреварувала за парламентарните избори на Косово
Д. Т.
