Специјалното обвинителство ја објави „Стратегијата за истрага и спречување на изборниот криминал“, за изборниот процес закажан на 11 мај, и нагласува дека ќе има теренска проверка на показателите или фактите за извршување на кривични дела во рамките на изборите за Собранието 2025 година, објавија албанските медиуми.
Мнозинство од пратениците на Европскиот парламент кои учествуваа во дискусиите за нацрт-извештаите за Косово и Србија, побараа Европската унија да го разјасни интегративниот процес на Косово, за оваа земја да не остане сива зона на картата на Европа, пренесуваат косовските медиуми.
Во продолжение се поместени содржините од денешниот редакциски избор на ЦИВИЛ Медиа, од албанските медиуми во регионот.
АЛБАНИЈА
Коха Јоне: СПАК ја обзнани стратегијата за истрага на изборниот криминал
Специјалното обвинителство ја објави „Стратегијата за истрага и спречување на изборниот криминал“, за изборниот процес закажан на 11 мај.
СПАК нагласува дека ќе има теренска проверка на показателите или фактите за извршување на кривични дела во рамките на изборите за Собранието 2025 година, Работната група ќе ги проверува извештаите кои предизвикуваат основано сомневање за злоупотреба на буџетот и јавните инвестиции во изборниот период од страна на специјалните субјекти, пренесе Коха Јоне.
Во фокусот на СПАК ќе бидат медиумите и социјалните мрежи кои ќе се следат за можни индиции за извршување на кривични дела во рамки на изборите.
Целиот процес според СПАК ќе се одвива благодарение на меѓуинституционалната соработка со Јавното обвинителство, Централната изборна комисија, Државната полиција, меѓународните организации и граѓанските организации кои ги следат изборните процеси.
Досја ал: Досега се регистрирани над 160 000 гласачи од дијаспората, соопшти албанската ЦИК
Парламентарните избори во Албанија ќе се одржат на 11 мај, а новина на овие избори ќе биде гласањето на дијаспората. Албанците кои живеат во странство ќе можат да гласаат без потреба физички да дојдат воземјата.
Апликацијата на која гласачите можат да се пријават во странство е достапна во различни форми, почнувајќи од официјалната веб-страница на Изборната комисија, но може да се преземе и како телефонска апликација. Во однос на регистрацијата, потребен ви е точен телефонски број, адреса на е-пошта, а потоа се креира лозинка која има 8 знаци. За да се активира регистрацијата, ЦИК испраќа 6-цифрена шифра за активирање преку е-пошта или телефонски број.
Претседателот на Централната изборна комисија Илирјан Целибаши соопшти дека од 11 јануари досега се регистрирани над 160.000 гласачи во странство, пренесе Досја ал.
Тој понатаму соопштува дека гласачите од странство чие барање за регистрација во ПЕР е одбиено, имаат право на повторно пријавување без ограничување до 04.03.2025 година.
Панорама: Од 1 март ќе биде готов пролетниот бонус за сите пензионери! Како ќе се поделат 62 милиони евра награда за 730.000 стари лица?
На располагање стојат 62 милиони евра на 730.430 пензионери кои ќе бидат поделени на две нивоа.
Почнувајќи од 1 март се планира да започне распределбата на пролетниот бонус за пензионерите. Станува збор за нов фонд што го определи Владата и депониран во Банката на Албанија со одлука од 9 јануари, но кој ќе се врати на годишен стандард, каде покрај бонусот за крајот на годината, ќе има и втор напролет, пренесе Панорама.
КОСОВО:
Газета експрес: Европратениците бараат да се забрза процесот на интеграција и да се признае Косово од петте земји од ЕУ
Мнозинство од пратениците на Европскиот парламент кои учествуваа во дискусиите за нацрт-извештаите за Косово и Србија, побараа Европската унија да го разјасни интегративниот процес на Косово, за оваа земја да не остане сива зона на картата на Европа.
Во четвртокот, на Комитетот за надворешна политика на ЕП, известувачот за Косово, Рихо Терас, го претстави својот годишен нацрт-извештај за ситуацијата во Косово и неговиот напредок кон ЕУ.
На дебатата беше изразено очекување Косово што поскоро, по парламентарните избори на 9 февруари, да го конституира Собранието и да формира Влада.
Додека беше критикувано одржувањето на казнените мерки на ЕУ против Косово, беше побарано да се задржи фокусот на регионот, особено на Косово, во време на, како што беше речено, предизвикувачки околности во Европа и светот.
Известувачот Терас рече дека очекува ЕУ да преземе поактивна улога во Западен Балкан и дека новата Европска комисија и високата претставничка Каја Калас ќе бидат во првите редови на оваа заложба, пренесе Газета Експрес.
Балкан веб: „Социјална помош во замена за глас“- Акција на косовската полиција на север, насочена кон српските структури
Косовската полиција во моментов спроведува акција во неколку нелегални канцеларии на Центарот за социјална работа на северот на Митровица.
Ова го потврди заменик директорот на полицијата за Северна Митровица, Ветон Елшани, кој за косовските медиуми изјави дека оваа акција е поврзана со апсењата кои биле извршени само еден ден пред изборите во Косово.
Според него, во канцелариите на центарот за социјални работи, кој бил паралелна/незаконска структура, имало сомневање дека телефонски им се јавувале на различни граѓани и во форма на закани ги принудувале или ги упатувале како да гласаат, условувајќи ја социјалната помош со нивниот глас во корист на одредена политичка партија која се натпреварувала за парламентарните избори на Косово, пренесува Балкан веб.
КОЛУМНА
Коха: „Тестот на Трамп во Украина“
„За Трамп е типично што неговите говори и однесување привлекуваат повеќе внимание отколку неговите политики или програма. На пример, иако има многу Американци кои се согласуваат дека владините трошоци се проблем што треба да се поправи, повеќето Американци се изненадени од начинот на кој Трамп се справува со УСАИД или од начинот на кој јавните службеници масовно се отпуштаат од работа.
Вака светот неделава беше изненаден од начинот на кој Трамп го најави почетокот на преговорите за ставање крај на војната во Украина. И додека избраната форма на Трамп беше некоректна, бидејќи тој во голема мера ги игнорираше Украина и европските сојузници, суштината на неговата одлука е правилна. Во историјата на човештвото, повеќето вооружени војни завршиле на преговарачка маса, а не на бојното поле. Дека преговорите се неизбежни се согласи и поранешниот претседател Бајден. Дури и самите Украина и Русија се согласуваат, поради што се обидоа во пролетта 2022 година да ги прекинат борбите преку тајни дипломатски преговори во Истанбул.
А денес особено ситуацијата на терен диктира таков политички курс. Борбите дојдоа до воен ќор-сокак каде ниту една страна не е способна воено да ја победи другата, а конфликтот се повеќе наликува на сцени од линијата Хинденбург.
Во Студијата на Центарот за стратешки и меѓународни студии, која ги испита сите вооружени конфликти од 1946 до 2021 година, се заклучува дека конфликтите што не завршуваат во првата година од борбите имаат тенденција да траат повеќе од една деценија. Ова не е во интерес на ниту една страна вклучена во конфликтот.“, пишува Авторот Демуш Шаша во колумната „ Тестот на Трамп во Украина“, објавена во косовскиот дневник Коха.
Подготви: Д. Тахири
