На градоначалникот на Ново Село, Боро Стојчев, кој пред неколку месеци беше фатен заедно со семејството како шверцува цигари преку македонско – бугарската граница, Апелацискиот суд во Штип му ја намали првостепената пресуда од 18, на 6 месеци, а струмичкиот суд ја потврди.
„Што се однесува до намалување на казната на градоначалникот на Ново Село од 18 на 6 месеци затворска казна, факт е дека е во рамки на законот, меѓутоа очигледно е дека со одлуката се тактизира да може повторно да ја обавува функцијата градоначалник“, вели за ЦИВИЛ Медиа, адвокатот Звонко Давидовиќ.
Со ова судска одлука на Стојчев му се овозможува да го исполни условот што е предвиден со член 54 од Законот за локална самоуправа, каде се вели дека мандатот му престанува ако е осуден на казна затвор над шест месеци.
Давидовиќ додава дека прашањето е колку и дали може да раководи со општината човек кој е осуден за шверц на цигари.
„Без разлика за колкава општина се работи, и со каков буџет располага, сепак се работи за човек кој е осуден за шверц. Ова го мислам и како обичен граѓанин, бидејќи ние во минатото се боревме против селективна правда, а со ова прогледување низ прсти се остава лош впечаток“, истакна Давидовиќ.
Градоначалникот Стојчев до крајот на оваа година ќе биде на слобода и ќе продолжи да ја води општината. Ново Село ќе се соочеше со локални избори, доколку не се намалеше казната затвор на градоначалникот Стојчев.
Дехран Муратов
