Во Министерството за економија немало ревизија цели 9 години и тоа мора итно да се направи, но не се работи за недоверба во работата на претходниот министер Крешник Бектеши. Ќе има одговорност за секоја евентуална злоупотреба или криминал во секторот, рече Бесар Дурмиши, министер за економија и труд, пренесе Слободен печат.
Новиот министер за економија и труд Бесар Дурмиши најавува ревизија во секторот што го раководи за да се видело како се работело низ годините во еден од најклучните економски ресори. Ова, според Дурмиши, не значи дека тој се сомнева во работењето на неговиот претходник Крешник Бектеши, туку дека таква проверка на институцијата немало од 2015 година.
– Во Министерството за економија немало ревизија цели 9 години и тоа мора итно да се направи, така што не се работи за недоверба во работата на мојот претходник. Ќе има одговорност за секоја евентуална злоупотреба или криминал во секторот – истакна Дурмиши.
Министерот за економија и труд им најави на новинарите дека на првата средба на Економско-социјалниот совет ќе се разговара за барањето на ССМ за зголемување на минималната плата на 450 евра, што Синдикатот го лоцира уште во првите 100 дена од новата влада. Според него, ќе се работи на подобрување на бизнис-климата и на заштитата на правата на работниците. Прашан како во иднина ќе се справуваме со инфлацијата и цените, Дурмиши најави итна средба и со коморите и производителите на храната, на која ќе се разгледа списокот од над 2.600 производи што треба да добијат ограничени маржи. Овој список ќе служи како Правилник, а производите ќе имаат ограничена маржа до 10 отсто. Списокот го разгледуваа и од Стопанската комора и Организацијата на потрошувачи.
– Дали ќе има зголемување на минималната плата ќе се дискутира на првата седница на Советот и ќе ги разгледаме сите опции што се во интерес на работниците, но и на работодавачите, а ќе ги разгледаме и сугестиите од коморите и производителите на храна – додаде Дурмиши и вети дека неуморно ќе се посвети за остварување на целите во насока на подобрување на економијата на државата.
Во таа насока ќе се ревидира и државната помош, што ќе значи поголема сума за домашните извозни компании.
– Ќе бидеме силен глас на бизнисот во Владата, бидејќи 13 отсто од БДП се прави во индустријата, а 99 отсто од претпријатијата се мали и средни – потсети Дурмиши.
Министерот порача дека Владата и МЕТ ќе ги поддржат сите иницијативи што доаѓаат од стопанските комори, иницијативи што ќе значат подобрување на економскиот амбиент во државата, како и подобрување на животните услови на сите граѓани во Македонија, односно додадена вредност во квалитетот на нивниот живот.
Дурмиши потенцираше дека соработката на Министерството за економија и труд со претставници на коморите во иднина ќе се одвива во сите фази на изготвување на закони, програми, стратешки документи и слично. Оваа соработка, како што посочуваат, вклучува земање предвид и вградување нивни сугестии, предлози и укажувања во сите документи и законски акти што се изработуваат. Годинава ќе се работи на новите закони за работни односи и за безбедност при работа, додаде Дурмиши.
