Мицкоски: Ако тераат инает може да им се случи народ на судиите со изгласана недоверба

Претседателот на Владата Христијан Мицкоски денеска го повтори ставот дека доколку членовите на Судски совет не постапат соодветно одлуката на парламентарците кои им изгласаа недоверба и се инаетат, дека е можно да им се случи народ, затоа што народот, вели, е желен за правда, а тој ќе го поддржи народот.

-Јасно е дека мал дел од обвинителите и судиите се последниот браник на Владата на СДСМ и ДУИ. Јасно е нивното однесување и јасно е тоа што го прават дел од членовите на Судски совет дека практично тие ги поддржуваат тие политики, и тоа однесување. Исто така, недвосмислено јасна е одлуката на тие коишто ги гласаа, а тоа се пратениците во македонското Собрание. Кога тие коишто претходно ја дале довербата, гласат интерпелација односно ви гласат недоверба, доблесно, чесно е да не правите трикови, да не барате дупки во законите, да си заминете. Многу едноставно. Гледаме дека поединци од таму тераат инает. Мислат дека со инает ќе успеат нешто да направат. Јас сум постојано со народот, и го слушам народот како реагира. И јас само сакам да кажам дека доколку не постапат соодветно на одлуката на тие коишто ги бираат, тоа се парламентарците, се плашам дека може да им се случи народ, да се самоорганизира и да протестира затоа што народот е желен за правда, рече премиерот Мицкоски на новинарско прашање по увидот на проекти во општина Ѓорче Петров.

Тој подвлече дека довербата од граѓаните на последните избори ја добиле токму заради нивните ветувања за правда за сите.

-Ние излеговме на избори, освоивме пола милион гласови, нас ни беше важно и многу важен дел од нашата кампања и програма беше правдата. Правда за сите, не само за поединци, туку правда за сите. И во име на тоа, имам чувство дека доколку дојде до ваква ескалација и излезе народ да протестира дека тој може да биде многуброен и нормално, поддржан лично од мене. Ако се служат со трикови, водат ианет дека може да се самоорганизира народ и да им се случи народ, наведе Мицкоски.

Тој не смета дека ова е преседан и дека со ваквата најава за протести се врши упад во независноста на правосудството, и додаде дека како претседател на Владата негова должност е да предупредува на последиците од однесувањето на членовите на Советот дека може да се случи народ, а како дополнително иритирачка ја оцени и одлуката на Судскиот совет за вд претседател на Врховниот суд да го именува судијата Џемали Саити, за кој вели дека е дирекно поврзан со сега опозициската ДУИ.

-Тоа е моја должност. Да не биде дека после не сум кажал. Затоа што ако не фатат во спиење и ни се случи народ, тогаш се плашам дека ќе има последици. Како во минатото се сеќавате имаше и други претседатели на Влада, коишто буквално ги користеа заканите за да партизираат во судството. Ќе ве потсетам, крајно дрска и разочарувачка одлуката на Советот за вршител на должноста претседател на Врховниот суд да постави човек којшто доаѓа буквално од кожната фотелја од салонот во Речица. Како тоа да не го иритира народот. Нормално дека народот ќе биде иритиран. Јас само пренесувам тоа што слушам. Децата си одат, не си одат поради економски причини. Сега за волјата на виситната процесот е обратен, но до скоро си одеа затоа што чувствуваа дека нема правда. Јас сум само должен само да предупреда, да не биде потоа не сме знаеле, не сме кажале, подвлече Мицкоски.

Тој потврди и дека судиите од Судски совет на кои им беше изгласана недоверба ќе продолжат да земаат плата, се додека не заминат од функцијата, што е вели уште една причина за револтот кај граѓаните.

-Очигледно, се додека не заминат од тоа место каде што се, граѓаните уште некое време ќе треба преку буџетот да ги плаќаат нивните високи плати и затоа тие се вознермирени. Затоа јас ја чувствувам таа негативна вибрација кај граѓаните, гледам дека работата зоврива и дека можно е да се самоорганизираат и тоа може да бидат масовни протести. И тука сум веќе и јас загрижен бидејќи логично е да се грижиме за безбедноста на државата, вели премиерот Мицкоски.

Собранието на седницата во вторникот изгласа недоверба на петмината членови на Судскиот совет избрани од Собранието – Весна Дамева, Павлина Црвенковска, Миљазим Мустафа, Тања Чачарова-Илиевска и Селим Адеми. Зад иницијативата за интерпелациии, поднесена на 7 февруари, застанаа 67 пратеници од владејачкото мнозинство, но за заминувањето од функциите на петте члена на Судскиот совет ќе треба да одлучат самите, а така налага и Законот за Судски совет.

Фото: ФБ на Христијан Mицкоски