Претседателот на Зимбабве, Роберт Мугабе и неговото семејство се наоѓаат во домашен притвор, соопшти зимбабвиската телевизија Њуз 24, јавува МИА.
Според локалниот медиум, 93-годишниот шеф на државата се подготвувал да поднесе оставка.
Владејачката партија на Зимбабве, Зану-ПФ објави на Твитер дека Емерсон Мнангагва е назначен за привремен претседател на државата наместо 93-годишниот Роберт Мугабе.
Партијата негира дека во државата е извршен воен удар туку дека случувањата во Хараре биле „пренесување на власта без пролевање крв“.
„Немаше воен удар само пренесување власт без пролевање крв. Притоа се уапсени корумпирани луѓе, а старецот кој го искористуваше неговата сопруга е притворен. Неколкуте истрели се од лоши луѓе кои давале отпор при апсењето, но сега и тие се во притвор“, се вели во еден од твитовите на партијата на Твитер.
Мнангагва (75) беше потпретседател на Зимбабве се додека Владата не го разреши поради „нелојалност“. Таа смена беше примена како подготовка за сопругата на Мугабе да ја преземе власта од него бидејќи таа претходно сама побарала од сопругот смена на Мнангагва.
Западни медиуми наведуваат дека не е јасно каде се наоѓаат Мугабе и неговата сопруга, но дека портпарол на армијата објавил преку државната телевизија дека „нивната безбедност е загарантирана“.
Војската синоќа ја презеде власта во Зимбабве, нагласувајќи дека не е извршен државен удар, туку само интервенција против „криминалците околу претседателот Роберт Мугабе кои им причинуваат социјално и економско страдање на луѓето“. Војниците обезбедуваат владини згради и патролираат низ улиците на Хараре, каде ноќеска беа регистрирани неколку силни експлозии. Армиски возила блокираа пристап до Парламентот, како и пред судовите.
Претходно беше уапсен и министерот за финансии Игнатиус Чомбо. Тој е влијателен член на таканаречената фракција „Г40“ на владејачката партија Африкански национален сојуз на Зимбабве – Патриотски фронт. Фракцијата ја предводи Грејс, сопругата на Мугабе, која планира да го наследи 93-годишниот претседател на функцијата шеф на државата.
Опозициската партија Движење за демократска промена повика за мирно враќање кон уставна демократија во земјата, додавајќи дека интервенцијата на војската ќе доведе до воспоставување на стабилна, демократска и напредна држава.
Влијателниот лидер на воените ветерани, кои водеа војна за независност на Зимбабве, Крис Муцванга ја повика Јужна Африка и други држави од јужниот дел на континентот, како и Западот, повторно да стапат во контакт со Хараре.
[divide]
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.