НАТО продолжува да бара од српските власти да ги гонат сите одговорни за актите на насилство во Косово во текот на 2023 година.
Ова го изјави функционер на западната воена алијанса, на ден пред почетокот на самитот на НАТО што се одржува во Хаг.
„Продолжуваме да ја повикуваме Србија да се погрижи одговорните за насилството во 2023 година да бидат изведени пред лицето на правдата“, изјави функционерот пред новинарите.
Тој го спомена нападот врз членовите на мисијата на НАТО во Косово – КФОР, што се случи во мај 2023 година пред зградата на општина Звечан, како и нападот во селото Бањска во септември истата година.
Според функционерот, Западен Балкан останува „регион од стратешко значење“ за НАТО и останува „високо на агендата“ на алијансата.
„Децениите тешко стекнат мир не смеат да бидат загрозени. Стабилноста во регионот зависи од подготвеноста на страните да изберат дијалог и соработка наместо насилство. НАТО дава важен воен придонес, но патот кон долгорочен мир е политички“, нагласи тој.
Функционерот потсети дека НАТО го поддржува мирот и стабилноста на Балканот од 1990-тите и дека посветеноста на алијансата „останува силна“ и нема да дозволи создавање „безбедносен вакуум“.
Тој ја потврди поддршката на НАТО за дијалогот меѓу Белград и Приштина, кој се води под посредништво на Европската Унија, како механизам за решавање на отворените прашања, почитувајќи ги правата на сите заедници.
„Во близок контакт сме со новиот специјален претставник на ЕУ за дијалогот, Питер Соренсен, и очекуваме двете страни да се вклучат во добра волја“, рече тој.
Тој додаде дека мисијата КФОР продолжува да го спроведува својот мандат непристрасно и во секое време.
„По насилните настани од 2023 година, распоредивме над 1.000 дополнителни војници во Косово и го зголемивме присуството на КФОР на север. Ова беше најголемото засилување на мисијата во последната деценија“, изјави тој.
Дводневниот самит на НАТО започнува утре во Хаг, а се очекува лидерите на 32-те земји-членки да постигнат договор за значително зголемување на инвестициите во одбраната, зголемување на индустриското производство во одбраната и потврдување на долгорочната поддршка за Украина.
Претседателот на САД, Доналд Трамп, за кого се очекува да остане само кратко на самитот, ги повика сојузниците да се согласат да ги зголемат трошоците за одбрана на пет проценти од бруто домашниот производ.
