Струшките вечери на поезијата ќе започнат утре, 21 август, со програма од 52 настани и 32 странски и 30 домашни поети.
Освен Струга како град домаќин, каде ќе се одржат најголем дел од настаните, поетите во рамките на програмата „Поезија на пат“ ќе се претстават и во Охрид, Калишта, Куманово, Велес, Прилеп, Небрегово и Скопје.
Една од новините во фестивалската содржина е „Поетската порака“, а нејзин автор годинава е македонскиот поет Влада Урошевиќ. СО поетската порака и официјално ќе започнат Струшките вечери на поезијата.
Фестивалот оваа година ќе биде четиријазичен, односно освен на англиски и македонски јазик, главните читања ќе бидат и на албански и француски јазик. Најголемиот дел од настаните ќе бидат пренесувани во живо на официјалниот YouТube канал.
Како новитет, „Струшки вечери на поезијата“ годинава преку повикот за волонтери, отвора можност за млади луѓе, вљубеници во пишаниот збор, да се ангажираат во логистичкиот дел на фестивалот и да добијат можност да се запознаат и да се дружат со врвни поетски имиња.
Фестивалските настани почнуваат утре во 10 часот со садење дрво во Паркот на поезијата во Струга и поетско читање во чест на добитникот на „Златен венец“ на СВП за 2019 година, славната романска поетеса Ана Бландијана.
Гала-отворањето на „Струшки вечери на поезијата 2019“ ќе почне во 20:30 часот на платото пред Центарот за култура. Половина час подоцна на истото место ќе почне поетското читање „Поетски меридијани“.
Програмата следниот ден, 22 август 2019 година, ќе продолжи во 10 часот во хотелот „Дрим“ со Портрет на Зоран Анчевски, добитникот на наградата „Браќа Миладиновци” за 2018 година. „Струшките вечери на поезијата“ ќе завршат во понеделник, 26 август со Меѓународно поетско читање во Музејот на современа уметност во Скопје.
Б. Ј.
