Новиот предложен закон за Јавно Обвинителство со кој СЈО ќе се спои со Јавното обвинителство за гонење на организиран криминал, предвидува и формирање на специјализираното судско одделение каде ќе им се суди на случаите отворени од досегашното СЈО и новоформираната Јавно Обвинителство за гонење на организиран криминал и висока корупција.
Ова се предвидува со членот 30 алинеа 4 на првичниот текст на предлогот кој власта му го испрати на ВМРО-ДПМНЕ за време на преговорите, а како што дознава ЦИВИЛ Медиа, истото решение било пренесено и во финалниот текст на предлог законот кој утре ќе влезе во собраниска процедура.
“Јавното обвинителство за гонење на организиран криминал и корупција постапува пред специјализираното судско одделение надлежно за судење на дела од областа на организираниот криминал и корупција, во Кривичниот суд Скопје.”, се вели во првичниот текст кој се најавува дека е пренесен и во најновиот предлог закон.
Во образложението се вели дека предлозите произлегуваат најголем дел од препораките на меѓународните организации и институциии за реформи во обвинителството и правосудниот систем. Со ова решение ќе се исполни и дел од забелешката и на внатрешната експертска јавност кои цело време алармирале дека една од причините за отежнување на работата на досегашното СЈО е и недостигот на специјален суд.
Од ВМРО-ДПМНЕ и денеска рекоа дека им треба повеќе време за да го анализираат целиот текст на предлог законот, но беа децидни дека за нив е неприфатливо Вилма Рускоска да биде на чело на новото специјално обвинителство.
„Во однос на законот како што рековме и вчера сè уште се вршат анализи во однос на целиот закон така што во текот на утрешниот ден и кога и да биде завршена таа анализа ќе излеземе со забелешки. Во однос на другите предлози, веќе кажавме за Вилма Рускоска. Таа е неприфатлива за нас бидејќи таа е во директна спрега со Зоран Заев“, изјави Димче Арсовски од ВМРО-ДПМНЕ.
Тие обвинија дека и решението Рускоска да биде главен обвинител е мешање на партиите во независноста на ова обвинителство. Но, од СДСМ демантираа дека се мешаат во изборот, објаснувајќи дека Рускоска има сè уште мандат на чело на обвинителството кое ќе се спои со СЈО и со тоа ќе се формира ново јавно обвинителство.
„Предлогот произлегува од фактичката ситуација. Во моментот во рамките на Јавното Обвинителство за организиран криминал и корупција функционира и избрана е од советот на јавни обвинители Вилма Рускоска. Од тука произлегува и предлогот таа да го продолжи новото Јавно Обвинителство за организиран криминал и корупција во рамките на Јавното Обвинителство.
Од ДУИ изјавија дека го подржуваат новиот предлог заонот и се надеваат дека низ парламентарна дебата на комисиите и пленарна седница ќе се надминат сите забелешки и законот ке добие потребно мнозинство.
Арбен Зеќири
