Заменичката министерка за внатрешни работи, Славјанка Петровска на панел дискусијата „Слободни избори наспроти црната пропаганда“ која денеска ја организира ЦИВИЛ зборуваше за хибридните закани врз демократијата, но и за неодамнешниот скандал со наводите кои ги изнесе словенечкиот портал Нецензурирано, за слевање на 2,5 милиони евра во пет медиуми во Македонија.
„Со право темата на хибридни закани станува актуелна особено во предизборието. Хибридната војна не е ништо ново во демократските земји во светот. Повеќе или помалку хибридните закани може да добијат дополнителен облик . Тоа значи дека некоја страна, во или надвор од државата, има некаков интерес да направи напад врз некој сегмент од општеството“, вели Петровска.
„Кога станува збор за работата на Министерството за внатрешни работи, наводите кои беа изнесени не може да бидат отфрлени со една политичка изјава. Затоа што наводите имаат сериозни индиции не само за хибридна војна, туку и за нелегално финансирање. МВР во координација со јавниот обвинител имаат добар материјал за започнување на предистражна постапка по ова прашање. Игнорирањето на вакви индииции е многу несериозен, затоа што ваквата постапка кажува колку овие прашања се важни за нас“, вели Петровска за последниот скандал со финансирање на дел од македонските медиуми.
Петровска смета дека решението на проблемите треба да го гледаме малку пошироко.
„Сите имаме свој делокруг на дејствување. Потребна е поширока државна стратегија во која сите чинители ќе бидат вклучени и ќе можеме заедно да се бориме против тоа. Целта на хибрините закани не се од добробит за државата. Затоа го сметам ова прашање за национално прашање и треба да добие поширок контекст“, вели Петровска.
На прашањето за тоа дали очекуваат фер и демократски кампања и избори, Петровска вели дека на почетокот на формирањето на техничката влада била оптимист, сега тоа е малку променето, дека во МВР се случуваат некои потези кои не оставаат впечаток дека се подготвуваат за фер и демократски избори.
„МВР е една од најчувствителните органи, улогата не е само чување на избирачките места, влијанието на полициските службеници може да биде злоупотребена, како што се правеше во минатото. Треба да испратиме проака дека МВР професионално ќе ги спроведе изборите, тоа значи старите манири на мешање на партиите треба да ги заборавиме“, вели Петровска.
Петровска вели политичките паритии ќе истапат со политичките програми и ќе дискутираат за нивните цели и ширењето на лажни вести и црна пропаганда ќе го остават на страна.
„Тоа не значи дека инстиутциите не треба да бидат будни и да реагираат. Политичката волја да биде поистакната, да се залагаат за позитивна кампања, не за ширење на лажни вести, институциите да бидат будни и да реагираат“, додава Петровска.
М. Ивановска / А. Петровска
