„Босна и Херцеговина е сè уште кревка. Особено поради потезите на Милорад Додик во Република Српска“, предупреди Карен Пирс, британскиот специјален пратеник за Западен Балкан, во интервју за Н1 Загреб.
Таа истакна дека Додик не им прави услуга на босанските Срби со својот пристап.
„Се обидува да го поткопа самото постоење на Босна и Херцеговина како држава со своите сецесионистички закони. Ние целосно ги поддржуваме Дејтонските критериуми: една држава, два ентитета, три составни нации. Ова е многу важно. Знам дека прашањето за изборниот закон е од голема загриженост за босанските Хрвати и ние сме подготвени да разговараме за тоа. Но, ако Босна и Херцеговина сака да постигне напредок во однос на членството во НАТО и Европската Унија, мора да го стори тоа како земја, што значи дека мора да ѝ помогнеме на Босна и Херцеговина на тој пат. А Додик оди во спротивна насока и не помага никому“, изјави Пирс.
Коментирајќи го стравот на граѓаните на Босна и Херцеговина од нови конфликти, таа изјави дека верува оти „целта и интересот на сите е да не се дозволи БиХ да се врати на ужасното насилство на кое бевме сведоци пред 30 години и на кое сме биле сведоци во неколку наврати оттогаш наваму на Западен Балкан“, наведувајќи дека се осврнува на конфликтот во Косово.
„Тие инциденти беа предизвикани од луѓе кои извршиле воени злосторства, кои биле осудени, многу од нив биле затворени или оттогаш починале. Цела Србија не треба да се смета за одговорна за злосторствата на Милошевиќ, но тоа наследство сè уште постои. Искрено се надеваме дека конфликтите нема да се повторат, изјави Пирс за Н1.
Јас силно го поддржувам присуството на ЕУФОР на терен. Како што знаете, според Дејтон, има висок претставник. Значи, меѓународната заедница е веќе силно вклучена во БиХ. Во оваа смисла, тоа претставува уникатен случај. Ниту една друга земја нема институција како високиот претставник, ОН има поинаква институција.
Се надевам дека можеме да им помогнеме на сите страни во Босна и Херцеговина да ги намалат тензиите, доколку се појават. Но, морам да нагласам дека секогаш има тропање на оружјето и тоа треба внимателно да се следи, но апелираме до сите политички лидери да го прават она што е во најдобар интерес на граѓаните на Босна и Херцеговина и да ги донесат законите потребни за Босна и Херцеговина да стане членка на ЕУ.“, вели Пирс.
Д. Т.
