Водач на суданската милиција, Али Кушајб е прогласен за виновен за извршување воени злосторства и злосторства против човештвото во регионот Дарфур пред повеќе од 20 години, пренесува Би-би-си.
Али Мухамед Али Абд-Ал-Рахман, попознат како Али Кушајб, беше еден од водачите на Џанџавид, група поддржана од владата која го тероризираше Дарфур, убивајќи стотици илјади луѓе.
Кушајб е првото лице кое е судено од Меѓународниот кривичен суд (МКС) за злосторствата во Дарфур. Тој тврдеше дека станува збор за случај на погрешен идентитет.
Конфликтот траеше од 2003 до 2020 година и беше една од најтешките хуманитарни катастрофи во светот, со обвинувања за етничко чистење и геноцид врз неарапското население во регионот.
Пет години по завршувањето на таа криза, Дарфур е клучно бојно поле во друга граѓанска војна, овој пат помеѓу суданската армија и паравоените Сили за брза поддршка (RSF), чие потекло лежи во Џанџавид.
За време на судењето на Кушајб, преживеаните опишаа како нивните села биле запалени, мажите и момчињата биле заклани, а жените принудени на сексуално ропство.
Претседавачката судијка Џоана Корнер рече:
„Тој ги охрабрувал и давал инструкции што резултирале со убиства, силувања и уништувања извршени од страна на Џанџавидите“.
Таа додаде дека Кушајб дал наредби да се „збришат и отстранат“ неарапските племиња и им рекол на војниците „да не оставаат никого зад себе. Да не донесат никој жив“.
Водачот на милицијата беше прогласен за виновен по 27 точки од обвинението, фокусирани на напади извршени помеѓу 2003 и 2004 година.
Војната во Дарфур започна откако владата доминирана од Арапите во тоа време ги вооружи Џанџавидите, во обид да го потисне востанието на бунтовниците од црните африкански етнички групи.
Џанџавидите систематски напаѓале неарапски селани обвинети за поддршка на бунтовниците, што довело до обвинувања за геноцид.
Истото систематско насилство сè уште се случува во Дарфур како дел од сегашната граѓанска војна во Судан.
Многу од борците на Џанџавид се префрлија во Силите за брза поддршка (RSF), паравоената група што се бори против суданската армија.
Велика Британија, САД и групите за човекови права ги обвинија RSF за спроведување етничко чистење врз неарапските заедници во Дарфур уште од почетокот на конфликтот во 2023 година.
Д. Мишев
