„Слободата се почитува. Независноста се брани. А иднината ја создаваат оние што одбиваат да се откажат од неа“, порача потпретседателот на Собранието, Антонијо Милошоски, на посебната сесија на Интерпартиската парламентарна група за поддршка на Кримската платформа, посветена на одбележувањето на 35-годишнината од независноста на Украина.
Говорејќи за истрајноста на украинскиот народ и за неговата борба за слобода и независност, Милошоски истакна дека украинската определба за сопствена иднина е длабоко вкоренета во историјата и дека правото на секој народ самостојно да ја определува својата иднина мора да биде почитувано.
„Секој народ има право самостојно да ја определува својата иднина и да живее во мир и безбедност“, порача Милошоски, нагласувајќи ја важноста од почитувањето на меѓународното право во услови на сериозни безбедносни предизвици на европскиот континент.
Потпретседателот на Собранието ја истакна солидарноста со Украина, нагласувајќи дека поддршката не е само политичка, туку пред сè човечка.
„Оваа земја стои во солидарност со украинскиот народ. Со братскиот украински народ. Нашата поддршка не е само политика, таа е пред сè и човечка“, рече Милошоски.
Тој потсети дека војната остава длабоки последици врз семејствата, децата и заедниците, но и врз идните генерации, поради што, како што нагласи, дипломатскиот ангажман и дијалогот треба да добијат централно место во напорите за постигнување траен и праведен мир.
„Мирот не значи само прекин на конфликтот, туку создавање услови Украина да може слободно, безбедно и достоинствено да ја гради својата иднина“, порача тој.
Милошоски истакна дека Северна Македонија, како земја која го избрала европскиот пат, ја разбира важноста на солидарноста, партнерството и заедничкото дејствување.
„Ќе продолжиме да бидеме доверен партнер и да придонесуваме кон напорите за стабилност, мир и безбедност во Европа“, рече тој.
Во тој контекст, тој ја нагласи важноста од континуирана поддршка за Украина и од заеднички европски и меѓународни напори за безбедност и мир.
Во својот говор, Милошоски се осврна и на Тарас Шевченко – еден од најзначајните украински поети и симбол на украинската култура, јазик и борбата за слобода.
На 24 август 1991 година, Украина го прогласи своето право на независност, а денес, по 35 години, тој идеал има уште поголема тежина како определба за Украина да постои како самостојна и слободна држава.
„Нашата порака денес е едноставна и јасна: стоиме со Украина и со украинскиот народ и посакуваме што поскоро да дојде денот кога мирот, слободата и безбедноста повторно ќе бидат реалност за сите граѓани на Украина“, порача Милошоски.
Одбележувањето на 35-годишнината од независноста на Украина во Собранието беше во знакот на солидарноста со украинскиот народ, почитувањето на неговото право на независност и поддршката за мирна, безбедна и слободна иднина.
ЦИВИЛ Медиа Деск
