Европските пратеници во вторник изјавија дека се загрижени дека Словачка се заканува да стане новото enfant terrible на ЕУ, пишува Политико.
„Дали Словачка е на пат да стане следната Унгарија? Да бидам искрена, тоа останува да се види, но некои модели се впечатливо слични“, рече Софи Вилмес, потпретседателката на Европскиот парламент со либералната група Renew Europe, за време на презентацијата на конечниот извештај од комитетот за граѓански слободи на Европскиот парламент (LIBE) по мисијата во Братислава.
Вилмес, поранешна белгиска премиерка, која сега претседава со надзорниот орган на Парламентот за владеење на правото и демократијата, предводеше група во Словачка од 1 до 3 јуни.
За време на мисијата за проценка на состојбата со владеењето на правото, демократијата и човековите права во земјата, делегацијата од четири члена се сретна со владини претставници, невладини организации, клучни политички играчи и новинари, пишува Политико.
Вилмес рече дека комисијата има загриженост во врска со независноста на судството во Словачка, притисокот врз медиумите, реформите во правосудството, како и законот насочен кон невладините организации што Братислава го усвои во април.
„Неколку реформи се особено загрижувачки, укинувањето на специјалното обвинителство и реструктуирањето на националната агенција за криминал, според нас, ја ослабнаа експертизата и капацитетот“, рече Вилмес.
Вилмес, исто така, ја истакна „вообичаената употреба на брзата законодавна постапка“ што „по дефиниција го ограничува парламентарниот надзор“.
Вилмес рече дека тонот на ангажманот со претставниците во Словачка бил „конструктивен“, во спротивност со искуството на членовите на парламентарниот комитет за буџетска контрола (CONT), кои ја посетија Братислава една недела претходно за да проценат наводни злоупотреби на средствата од ЕУ.
Д. Т.
