Професорскиот пленум (ПП) на 25 септември одржа Генерален пленум на кој ја отпочна интерната расправа за нацрт-текстот на новиот Закон за високо образование, изготвен од експертската група на Пленумот.
Основа за изработка на текстот е концептот за Закон за високото образование, претходно усвоен од трипартитната комисија формирана од Универзитетот „Св. Кирил и Методиј“, а составена од претставници на Ректоратот на Универзитетот, на Студентскиот пленум и на Професорски пленум. При изработката на текстот, групата се водеше од уставно загарантираната автономијата на високото образование (универзитетот), околу што главно се судираа ставовите меѓу академската заедница и претходната Влада. Неопходно беше таа автономија во законот да се одрази преку рамка која ќе поддржи висок степен на само-регулација, заснована на принципите на одговорност и отчетност во вршењето на оваа дејност од јавен интерес.
Според Пленумот, треба да има нов начин на финансирање кој ќе се остварува преку Советот за финансирање и развој на високото образование. Финансирањето на дејноста ќе се остварува првенствено преку надоместување на цената на чинење на студиско место, согласно утврдена методологија којашто ги отсликува спецификите на различните студиски програми.
Од Пленумот соопштија дека деловите на законот за избор и напредување на академскиот кадар се значително променети, при што се предлага со закон да се уредат условите и начелно да се постават критериумите за избор во звања. Поспецифично уредување ќе направат универзитетите, преку нивните форми за соработка, земајќи ги предвид спецификите на научните и уметничките подрачја.
Наспроти досегашниот централизиран универзитет, се предлага се предлага интегриран, односно, функционална интеграција на универзитетот која овозможува внатрешна автономија и демократизација во управувањето и одлучувањето, наспроти досегашната практика на централизација на моќта.
Прашањата за осигурување на квалитет во високото образование се уредени на начин којшто поддржува висок квалитет на високообразовната дејност, а за истите ќе се грижи Агенција за квалитет во високото образование, акредитирана во Европската агенција за осигурување на квалитет.
Од Пленумот потенцираат дека статусот на студентите, нивните права и обврски и особено, начинот на нивно организирање и учество во управувањето, ќе се изработува во соработка со студентите како засегната страна.
По усвојување на предлозите и на забелешки на членовите, Професорскиот пленум пред академската и пошироката јавност, ќе го презентира својот предлог за нов Закон за високо образование .
