Продолжува јавниот увид во Избирачкиот список за референдумот на 30 септември, а паралелно до 23 август тече и рокот за пријавување на македонските државјани за изјаснувањето.
Според податоците од Државната изборна комисија до 13 август во подрачните одделенија и канцеларии на ДИК увид во Избирачкиот список направиле вкупно 1.216 граѓани. Најголем број граѓани увид извршиле во Битола – 188, во Радовиш – 104 и Струмица – 101. Граѓаните може да ги проверат своите податоци во Избирачкиот список и електронски преку веб страната на Комисијата www.sec.mk.
Од ДИК информираат дека педесет и девет лица од општините Кисела Вода, Студеничани, Сопиште и Зелениково ќе бидат избришани од Избирачкиот список. Според информациите од подрачната канцеларија на Државната изборна комисија (ДИК) во Кисела Вода станува збор за починати лица, за кои изводи од умрените до 13 август до нив доставиле по службена должност месните канцеларии на Управата за матична евиденција по почетокот на јавниот увид за есенскиот референдум.
Освен во овие четири општини, барања за бришење на седум лица од Избирачкиот список до 12 август има и во канцеларијата на ДИК во Демир Капија. ДИК има подрачни канцеларии во 18 поголеми општини во земјата, кои ја покриваат целата територија на Македонија.
До вчера, пак, преку апликацијата на ДИК доставени се вкупно 742 пријави од граѓани за изјаснување во македонските дипломатско-конзуларни претставништва во странство за претстојниот референдум. Од нив, 702 пријави се прифатени, 11 се одбиени, а останатите се во обработка, соопшти ДИК.
Од информациите и податоците со кои располага ЦИВИЛ – Центар за слобода, старите проблеми со Избирачкиот список повторно се вратија. Фантомските гласачи кои на увидот на последните локални избори во 2017, како и на парламентарните избори во 2016 година беа пријавени до службите на ДИК и МВР се повторно вратени во Избирачкиот список. Доказ за тоа се десетиците пријави кои секојдневно стигнуваат до ЦИВИЛ.
Граѓанките и граѓаните се револтирани бидејќи одново се наоѓаат во ситуација да ја завршуваат работата на институциите.
К. С.
