Градоначалничката во заминување на Град Скопје, Данела Арсовска, повторно се обиде да се врати во фокусот – овојпат со целосна дезинформација.
Во Фејсбук статус објавен пред 17 часа, таа напиша дека директорот на ЈП „Комунална хигиена – Скопје“, Сабахудин Рустеми, по само неколку часа во притвор, бил ослободен, дека „не е виновен за ништо“ и дека „работата ја вршел чесно и совесно“.
Меѓутоа, МВР поврди за ЦИВИЛ дека лиицата што беа приведени во рамки на истрагата и понатаму се во притвор.
„Никој не е ослободен, а тврдењето на Арсовска е невистинито и манипулативно“, вели за ЦИВИЛ, порпаролот на МВР, Гоце Андреевски.
Со тоа, градоначалничката не само што шири лажни вести, туку и директно ја поткопува довербата во институциите – токму во момент кога јавноста бара одговорност за хаосот со ѓубрето и нефункционалноста на претпријатието.
Во својот статус, Арсовска дури саркастично тврди дека директорот бил пуштен бидејќи „во срце и душа бил ВЛЕН“, а во станица потпишал изјава за членство во коалицијата што е дел од владата.
„НАЈНОВА ВЕСТ: Директорот на Комунална хигиена Скопје е пуштен, не е виновен за ништо, работата ја вршел чесно и совесно.
Оваа информација пристигна откако по неколку часа убедување во полициска станица, директорот на Комунална хигиена им кажал дека во срцето и душата е ВЛЕН, уште додека бил во станица му донеле да потпише изјава за членство по што е пуштен да си продолжи со успешната работа во претпријатието.
Во меѓувреме Мицковски и МВРО упорно бараат некој од ДУИ да го апсат како што ветија, тргнаа по Изет Меџити од ДУИ, па откако стана ВЛЕН си го земаа во коалиција“, објави Арсовска.
Таквиот тон, кој очигледно сака да го прикаже апсењето како партиска фарса, сега се претвора во свесно ширење невистини со политичка цел.
По вакви примери, станува јасно дека „комуналната хигиена“ во Скопје не треба само за улиците – туку и за политичкиот простор, кој очигледно е преполн со ѓубре од лаги и дезинформации.
Полицијата вчера ги приведе директорот Сабахудин Рустеми и Аки Саити од Сарај, раководител во Комунална хигиена, откако минатата недела Основното јавно обвинителство започна истрага поврзана со неработењето на јавното претпријатие што резултираше со натрупување на огромни количини ѓубре во главниот град.
Тие се товарат за кривично дело загрозување на животната средина и природата со отпадни материи, кој ги санкционира делата поврзани со постапување со отпад со кои се менува квалитетот на воздухот, почвата, водата или водотекот, во мера што може да ги влоши условите за живот на луѓето или животните или растенијата и да го загрози нивниот опстанок.
Дехран Муратов
