Дека во изминатите 30 години недоволно се инвестирало во противпожарните служби, се докажа и во справувањето со пожарите кои ја зафатија деновиве земјата. На површина излегоа системски слабости, меѓу кои и недостатокот на соодветна опрема и пожарникари. Законот налага минимален број пожарникари по број на жители, но ретки се општините во кои тоа е запазено.
Пожарите што ја зафатија Северна Македонија, го отворија прашањето сее потребни измени на Законот за пожарникарство, за негово поефикасно спроведување во пракса, но и на формирањето на доброволните противпожарни друштва, по примерот на некои соседни држави.
Законот налага минимален број пожарникари по број на жители, но ретки се општините во кои тоа е запазено. Во најголем број од нив, бројот на пожарникари е многу помал. Во пракса, Законот не се спроведува и во делот дека помалите општини, во кои нема противпожарни служби, треба да исплаќаат одреден финансиски надомест за пожарникарските интервенции.
Градоначалникот на Кочани, Николчо Илијев, за МИА изјави дека тоа е долгорочен проблем со кој се соочуваат како локална самоуправа.
“Пробавме да најдеме соодветно решение, меѓутоа, за жал, од соседните општини немаме поддршка и разбирање. Понудивме договори за меѓуопштинска соработка каде точно со закон е регулирано дека за да се добие некоја општинска услуга треба да се има и договор за меѓуопштинска работа. За жал, тие договори не беа потпишани од нивна страна”, истакнал Илијев, апелирајќи до соседните општини Зрновци и Чешиново-Облешево да размислат и дел од средствата од буџетите да ги пренаменат за потребите на противпожарната служба.
Истражувањето на Центарот за граѓански комуникации покажа дека на државата ѝ недостасуваат над 500 пожарникари. Во најголем дел од општините, бројот на пожарникари е под законски утврдениот минимум, а во оние општини кои го задоволуваат минималниот број, противпожарните служби велат дека имаат потреба од повеќе вработени/ МИА
