На социјалните мрежи сѐ уште е активен повикот „Мандат револуција“ закажан за 4 мај пред Собранието на Република Северна Македонија, ден пред вториот круг од претседателските избори. Настанот е администриран од Фејсбук страницата Република Македонија, а образложението за одржување на настанот е „незадоволството на граѓаните“.
Крајната цел на анонимните организатори сѐ уште не е позната, ниту за јавноста, а веројатно ниту на самите организатори. Единствено што е јасно е дека одржувањето на „револуцијата“ претставува сериозно кршење на изборниот молк.
Од самата страница и од содржината на повикот лесно може да се претпостави во која партиска кујна се продуцира овој онлајн пропаганден материјал со кој се крши Изборниот законик. Повикот може да се протолкува единствено како политичка пропаганда во изборен контекст. Без оглед на тоа дали се работи за повик да се гласа за одреден претседателски кандидат или е своевиден повик за бојкот на претседателските избори во вториот круг, ова кршење на изборниот молк во најава содржи и отворен говор на омраза врз етничка основа, со нагласувањето на „албанскиот политичар“ како најголемата опасност на македонскиот народ, како и врз политичка основа, нагласувајќи го „македонскиот политичар“ кој, заедно со „албанскиот политичар“ претставува „закана“.
Воедно, повикот дополнително е злоупотреба и манипулација на идејата граѓанските демократски иницијативи, меѓу другото, со слоганот „Нема правда, нема мир“ со кој се прави обид да се присвои граѓанскиот отпор во периодот до 2016 година.
„Нема лоша влада, сите се добри за рушење“, „Паралелното општество се однесува на самоорганизација на етничко или религиозно малцинство, со намера да се намалат или минимализираат просторни, социјални и културни контакти со мнозинското општество. Тоа е нашата реалност во Република Македонија“, „Кој нема избор, има избори“ се само дел објавите на настанот.
ЦИВИЛ – Центар за слобода ги повика Министерството за внатрешни работи и Државната изборна комисија, соодветно на своите законски надлежности да преземат мерки да се спречи кршењето на изборниот молк што е повеќе од очигледно од овој пропаганден атак на социјалните мрежи.
ЦИВИЛ објави дека се нотирани „над 40 случаи на кршење на изборниот молк, а меѓу оние кои го кршат изборниот молк се наоѓаат и политички партии, активисти, вработени во јавни институции, но и граѓанки и граѓани. Забележани се и содржини на дел од интеренет порталите што не се придржуваат до изборниот молк и објавуваат манипулативни содржини и текстови што ги содржат имињата на политичките партии и нивните кандидати за претседател“.
Маја Ивановска
