Основната јавна обвинителка на Основното јавно обвинителство за гонење на организиран криминал и корупција Вилма Русковска одржи прес – конференција во врска со спроведената акција во јавноста позната под името „Планина“.
„За членовите на криминалните групи од село Грчец и општина Гази Баба се собираа докази една година. Се побараа наредби за посебни истражни мерки, следење на комуникации и посебни истражни мерки која е следење на приватен имот. Истражителите на обвинителството беа во техниката каде што се вршеше следењето на комуникациите кога имаа сознанија дека одредени лица ќе вршат продажба на наркотична дрога. Со помош на одбрани лица на интервентната полиција беа запрени и им беше земена наркотичната дрога што ја лицата ја имаа купено. Дрогата беше одземена и дадена на вештачење ако ја земале за лична, а ако ја препродавале, кривична постапка во ОЈО во Скопје. Така цела година собиравме докази за сите членови на овие групи. Зборувам во множина бидејќи немаме докази дека биле поврзани. Откако сметавме дека за сите лица имаме доволно докази се организираше акција за нивно лишување од слобода. Во село Грчец се извршени претреси на 26 локации. Лишени се од слобода 13 лица од кои за 9 лица е определена мерка притвор, за 3 мерка куќен притвор и за 1 мерка на претпазливост. Од оваа група 5 лица ни се недостапни“, изјави обвинителката Русковска на денешната прес-конференција во врска со спроведената акција во јавноста позната под името „Планина“
За едно малолетно лице кое било дел од групата од село Грчец, ќе се води посебен предмет.
За криминалната група од Гази Баба извршени се претреси на 9 места, од кои 8 лица се приведени и се наоѓаат во притвор, а по едно лице се трага. Од двете групи се одземени повеќе од 80.000 евра, 300.000 денари и 500 франци. За пронајдената наркотична дрога, вештачењето не е завршено, но околу 5 кг марихуана и 600-700 грама кокаин. Најголемиот број од парите и запленетата дрога се најдени при претресите извршени во Гази Баба, додека многу малку е пронајдено и одземено во село Грчец, затоа што поради посебни истражни мерки тие денес завршуваат, а се однесуваат за овие 6 лица по кои се трага, имаме информации дека акцијата во Грчец е пробиена. На местата каде имавме сознание дека се чува дрогата беше исчистено, со што полицијата не успеа да пронајде поголема количина дрога. Без разлика на количината на пронајдена и запленета дрога, располагаме со цврсти докази за сите лица за кои е почната истражна постапка. Од почеток знаевме дека нема да најдеме голема количина, па затоа за секого поединечно собиравме докази. Одземени се само 3 возила, 2 од Грчец и една од Гази Баба. Најлуксузните возила во Грчец се прикриени.
„Сакам да изразам благодарност на интервентната полиција, истражителите и едниците за интервенирање при МВР. Сакам да се заблагодарам за Министерството за здравство за брзите тестови за оние кои се лишени од слобода“ рече Русковска.
На новинарските прашања, обвинителката Русковска изјави дека немаат сознание дали лица од МВР биле вмешани, а од приведените нема „нарко-босови“, туку само купувачи.
Побарано е од надлежните полициски станици да им достават на Основното јавно обвинителство известувања дали овие лица се достапни или не. Доколку не се, по нив ќе се изрече притвор во отсуство, а по потреба и домашна и меѓународна потерница.
