„Живееме во време на предизвик без преседан, предизвикан од пандемијата Ковид-19. Глобалните проблеми не можат да имаат национални решенија и, на многу начини, оваа пандемија на Коронавирус е тест за нашата европска солидарност. Институциите на ЕУ направија добро и претставија еден унитарен фронт во предлагањето на европски решенија – решенија засновани на солидарност и кои се стремат да не ги остават зад себе најранливите земји“, вели претседателот на Европскиот парламент, Давид Сасоли во одговорот на писмото испратено на 25 март од претседателите на Парламентите на земјите од Западен БалканПретседателите на парламентите на Северна Македонија, Талат Џафери, на Албанија Грамоз Ручи, на Претставничкиот дом на Парламентарното Собрание на БиХ, Денис Звиздиќ, на Народниот дом на Парламентарното Собрание на БиХ Драган Човиќ, на Косово Вјоса Османи, на Црна Гора Иван Брајовиќ и на Србија Маја Гојковиќ на 25 март упатија апел за помош на Западен Балкан во борбата против пандемијата на Ковид-19 до Сасоли и до претседателката на ЕК Урсула вон дер Лејен.
„Западен Балкан е дел од нашето европско семејство и нивната европска определба е несомнена. Затоа, целосно се согласувам кога ќе кажете дека сите мерки преземени на европско ниво треба да ги вклучат вашите земји и во најмала рака да не предизвикаат негативни последици врз вашите напори да се справите со пандемијата Ковид-19.
Бидете уверени дека ЕУ веќе бара начини да го вклучи вашиот регион во своите механизми за одговор. Како претседател на Европскиот парламент, ве уверувам во мојата целосна поддршка за изнаоѓање на најдобри решенија за да бидете заштитени од негативните последици од оваа криза. Добрите пријатели ја покажуваат својата љубов во време на неволја, не само во време на среќа. Ова е време за солидарност и вашиот регион треба да биде вклучен. Ако останеме обединети, можеме да излеземе посилни од кризата!“, одговара Сасоли.
