„Како држава ние немаме 19 години спроведено попис, и ако сме барем малку одговорни, ние во локалната самоуправа немаме право да стравуваме од обврските за пописот, бидејќи тие податоци се основа за креирање политики на локално ниво“, вели Петре Шилегов, градоначалникот на Град Скопје, на панелот на ЦИВИЛ, „Како сѐ може да се (зло)употреби пописот?“.
„Ние како ЗЕЛС имавме средба со ДЗС да ги направиме подготовките за спроведување на пописот во инфраструктурна смисла, просторна и техничка пред се и дел од персонал, и мислам дека сме подготвени да ги исполниме барањата на Заводот за статистика што ќе ги достават до нас (градоначалниците).
Многу е битно да ги добиеме податоците и како држава и како единици на локална самоуправа, бидејќи тие податоци се основата за креирање на развојните политики во самите единици во локалната самоуправа во микро-економското планирањето на делот што општините го имаме како ингеренции. Ќе добиеме и податоци за определени научни истражувања кои се одбвиваат на ниво на држава.
За нас пописот ќе биде од корист за планирање на добра инфраструктура, да може да испланираме паркови, плоштади, јавни простори, да имаме одржлив сообраќај затоа што ние немаме точни податоци за бројот на домаќинства, ниту на возила… Тие податоци се битни за Град Скопје за да знаеме каде да вложуваме во инфраструктурата, туку ние досега одиме на искуство и на податоци кои ги имаме од претходно“, вели Шилегов.
Тој вели дека во изминатите години имаа потешкотии да ги спроведат активностите.
„Гранап да имате ќе мора еднаш годишно да направите попис. Без попис не можете да си го водите бизносот, затоа се прави попис на секои 10 години, за да може да се креираат политики на долг рок.
Ние немаме поинаков избор, мораме да ја реалирираме оваа обврска. Стандардите кои ги применува ДЗС се во согласност со стандардите на ОН и Еуростат.
Како ЗЕЛС уште од 2018 година како подготовка на Законот за попис имавме декларирано членови во советот на Заводот за статистика, тоа е Борјанчо Мицевски градоначалникот на Крива Паланка и Фатмир Дехари, градоначалникот на Кичево со цел да дадеме придонес или наши размислувања како ЗЕЛС во рамки на овој закон“, рече тој.
Шилегов истакна дека локалната самоуправа ќе биде сервис и ќе ги исполнат барањата на ДЗС за успешно спроведување на пописот. Тој вели дека не ни размислува за одложување на пописот, додавајќи колку побрзо го завршиме пописот толку побрзо ќе продолжиме со процесите.
„Ако го одложиме овој попис, тогаш ќе излеземе од методите и стандардите за ваква операција, не случајно овој период се одбирал како за најповолен период.
Обидите за политиканство и бојкот на пописот од одредени политички структури се обид за деструкција на процесите кои едноставно мораме да ги направиме како држава. Ние немаме право да бидеме деструктивни ни кон државата, ни кон општеството, најмалку кон граѓаните“, нагласи Шилегов.
Скопскиот градоначалник апелира до граѓаните масовно да се одзват на обврската за попис и луѓето што ќе ја вршат теренски оваа работа да бидат добро пречекани во секое домаќинство.
„Политичко лицемерие е тоа што го прават тие што даваат отпор да се спроведе пописот“ вели Шилегов, додавајќи „во оваа фаза ќе се повикуваат на деструкција и одлагање, а во некоја друга фаза ќе има обвинувања зошто не е завршен пописот“.
„Во Град Скопје ме критикуваат зошто направивме парк и сме потрошиле 300 илјади евра, бидејќи било пандемија и не е време за правење на такви работи, а веќе наредната недела ме критикуваат зошто не го направивме забавниот парк. Јас кога бев во опозиција бев жесток критичар, меѓутоа за проблемите нудев и решенија како соодветно да се постапи“, вели Шилегов.
Тој вели дека опозициската политичка структура е структура која знае само да предизвикува паники и лажни вести.
„Ќе ве вратам малку наназад, кај се бегалските кампови, кај е растурената држава поради Преспанскиот договор, додека се одвиваа преговори со Бугарија за отпочнување на датум за преговори со ЕУ, имавме изјави во смисла ‘ова ќе потпишат со Бугарија, она ќе потпишат’, а ништо од тоа не се случи…
Немаме право заради дневно-политички поени да ги стопираме стратешките процеси на државата“, нагласи Шилегов.
Д.М.
камера: Атанас Петровски
монтажа: Ариан Мехмети
фотографија: Горан Наумовски
