Како што наведува ова собрание во соопштението, одлуката е донесена врз основа на Уставот на Република Србија, законот за локална самоуправа, статутот на градот Нови Сад и правото на граѓаните да се собираат и да ги изразуваат своите политички ставови, пишуваат српски медиуми.
„Оваа одлука е донесена како директна реакција на постапките на претседателот на Република Србија, Александар Вучиќ, кој ги злоупотреби своите уставни овластувања да помилува лица за бруталното претепување на студентка која претрпе тешка телесна повреда во форма на скршена вилица. Овој чин беше сфатен од јавноста како институционално одобрување и охрабрување на насилство, особено врз жените и младите луѓе, и како грубо понижување на жртвата, правосудниот систем и општествените вредности што ги штитат основните човекови права и достоинство“, се вели во соопштението на собранието на оваа локална заедница.
Граѓаните на локалната заедница „Народни херои“ од Нови Сад го сметаат ова однесување на претседателот на Република Србија за неморално, антидемократско и опасно за социјалната сигурност, и како такво го лишуваат од легитимитетот да дејствува како претставник на сите граѓани.
„Затоа, претседателот Александар Вучиќ е прогласен за персона нон грата на територијата на оваа локална заедница. Одлуката е израз на граѓанската волја и политичкиот став на граѓаните на оваа локална заедница и има симболичен и политички карактер“, заклучуваат тие.
Д. Т.
