Регионална канцеларија за младинска соработка (RYCO) е меѓународна организација основана од 6 учесници од Западен Балкан – Албанија, Босна и Херцеговина, Косово , Црна Гора, Северна Македонија и Србија, чија цел е да го промовира духот на помирување и соработка меѓу младите во регионот преку програми за размена на млади.
RYCO промовира помирување, доверба, соработка и дијалог на Западен Балкан преку поддршка и финансирање на проекти кои ги зближуваат младите од регионот.
Локалната канцеларија на RYCO во Северна Македонија денеска го одржа својот годишен онлајн настан на кој ги презентираше активностите кои ги спроведуваат во соработка со нивните партнери. На настанот присуствуваа партнерите на RYCO, вработени, како и поранешни членови на Управниот одбор и Советодавниот одбор кои ја претставија својата работа и придонес за развојот на RYCO.
Програмскиот асистент во локалната канцеларија на RYCO во Северна Македонија, Елена Мишеска, покрај презентацијата на агендата за денешниот настан, го претстави и годишниот извештај за 2020 година и планираните проекти за 2021 година.
Директор на Агенцијата за млади и спорт на Северна Македонија, Наумче Мојсоски ја претстави важноста на соработка помеѓу институциите за млади и младите, како и соработката на АМС со RYCO во Северна Македонија. Тој во своето завршно обраќање изјави дека целта е да се обединат сите млади на Балканот.
Поранешниот младински претставник на Северна Македонија во Управниот одбор на RYCO, Владимир Ѓорѓевски и Методија Стојчески, поранешен член на Советодавниот одбор на Северна Македонија во RYCO преку презентација и споделување на искуства за нивната долгогодишна работа во RYCO, го истакнаа значењето на приклучувањето на младите во регионот преку програми за размена на млади во 6 земји учесници од Западниот Балкан.
Андреа Угриноска , поранешен член на Советодавниот одбор на Северна Македонија во RYCO и Ѓорѓи Тасев, советник на Премиерот на Северна Македонија за млади и спорт, преку видео порака раскажаа за своите искуства и придонеси при работењето во RYCO, како и мерките и активностите што се преземаат за поддршка на развојот на младите во нашата земја.
Директор на локалната канцеларија на RYCO во Северна Македонија и ново назначен Генерален секретар на RYCO, Алберт Хани во своето завршно обраќање ги претстави генералните активности на локалната канцеларија на RYCO во Северна Македонија и новата визија за RYCO, како и подобрување на младите во нашето општество.
Агенцијата за млади и спорт на Северна Македонија има отворено повик за младински претставник на Северна Македонија во Управниот одбор на RYCO, кој трае до 25 март. Избраниот младински претставник на Северна Македонија во Управниот одбор на RYCO ќе добие мандат од три години, а во нејзината/неговата работа ќе ги застапува интересите на младите во Северна Македонија.
Настанот имаше за цел да ги претстави искуствата од плодните и успешни соработки, како и да се осврне на препораките и предлозите кои се од исклучително значење за зголемување на учеството и соработката на младите.
И.К.
