ЦИВИЛ ќе одржи прес конференција на која ќе стане збор за информациите и анализите што произлегуваат од досегашниот мониторинг на изборниот процес. Прес конференцијата на ЦИВИЛ ќе се одржи денеска (вторник), 21 септември, во 12 часот на македонски и во 12:30 часот на албански јазик, во Прес центарот на организацијата што се наоѓа на 3. кат во Бизнис центарот „Палома Бјанка“.
Не треба ли да се размисли за укинување на строгите, формални, предизборни кампањски „стеги“, кои и така никој не ги почитува? Овде кампањите се водат 365 дена во годината, пауза не се прави – видовме – ни за државни или верски празници. Ниту некој има суштинска контрола врз потрошените пари, ниту условите за кандидатите се „фер и избалансирани“, а институциите кои би требало тоа да го контролираат само ги доведуваме во ситуација да се компромитираат, бидејќи треба да спроведат закони и прописи за кои сите се свесни дека се (речиси) неспроведливи, пишува Сашо Ордановски во денешната колумна „Изборите се како битката кај Ватерло!“.
СЕДНИЦА Во Собранието денеска седници ќе одржат комисиите за политички систем и односи меѓу заедниците, за европски прашања, за труд и социјална политика и за земјоделство, шумарство и водостопанство.
Предлог-законот за Академијата за судии и јавни обвинители, во прво читање е единствена точка на дневниот ред на Комисијата за политички систем и односи меѓу заедниците.
На предложениот дневен ред на Комисијата за европски прашања се Предлог-законот за заштита на физичките лица во врска со обработката на личните податоци за цели на спречување, истрага, откривање или гонење на кривични дела или за извршување на кривични санкции, предлог-законите за адвокатурата, за граѓанската одговорност за навреда и клевета, за Академијата за судии и јавни обвинители и Предлог-законот за изменување и дополнување на Кривичниот законик, сите во прво читање.
Членовите на Комисијата за труд и социјална политика треба да ги разгледаат Предлог-законот за изменување и дополнување на Законот за работните односи во второ читање и Годишниот извештај за работењето на Агенција за супервизија на капитално финансирано пензиско осигурување во 2020 година и финансиските извештаи на оваа институција за 2020 година.
Предлог-законот за дополнување на Законот за ловството во прво читање, поднесен од група пратеници е единствена точка на дневниот ред на Комисијата за земјоделство, шумарство и водостопанство.
КУЛТУРА Со доделување на фестивалските признанија и награди, вечер во Битола завршува 42. издание на Интернационалниот фестивал на филмската камера „Браќа Манаки“. Во големата сала на битолскиот Центар на култура, жирито предводено од Суки Меденчевиќ од Босна и Херцеговина и членовите Филип Бергсон од Велика Британија, Вим Ванакер од Белгија, Соња Просенц од Словенија и Димо Попов од Северна Македонија, ќе доделат златна, сребрена и бронзена „Камера 300“, како и награда мала „Камера 300“ за кинематограферите кои конкурираа за престижните награди.
