Иако предпладне се скараа и разменија низа обвинувања за и против спроведување на пописот следната година, власта и опозицијата, по работната средба излегоа со зближени ставови на оваа тема. Двете страни потврдија напредок во денешните разговори на работните групи кои од една страна ги водеше Илија Димовски придружен од експерти, а од другата страна на чело беше директорот на Заводот за sтатистика, Апостол Симовски.
“На остварената средба со претставници на Владата на Република Северна Македонија ги адресиравме и ги кажавме сите наши забелешки кои не се малку и не се од несуштински карактер, а одат во насока на исполнување на стандардите на Еуростат и изградба на доверба на институциите кои што треба да го спроведуват пописот. Денешната средба помина во коректна атмосфера, не добивме конкретни одговори по нашите барања, оставивме следните десетина дена представниците на Владата да изградат нов концепт за пописот на кој ќе се адресираат стравовите кои ги имаме и ние и граѓаните на РСМ, но ќе одговорат и на стандардите на Еуростат. Мислам дека следната средба ке биде клучна да видиме колку власта е спремна да ги прифати овие укажувања. Атмосферата денеска беше коректна но беше без посебни заклучоци”, изјави пратеникот на ВМРО-ДПМНЕ, Илија Димовски.
Директорот на Државниот Завод за Статистика, Апостол Симовски изјави дека дел од забелешките на опозицијата биле лесно прифатени и според него повеќе имаат текнички карактер. На пример, власта резидентното население го дефинира според дефиницијата на Еуростат, а опозицијата побарала оваа дефиниција да влезе и во законот.
Исто така, опозицијата побарала и методологијата да влезе во заонското решение, а власта цени дека законот треба да даде заонска рамка за методологијата. Според Симовски има простор и за разгледување и на другите забелешки на опозицијата.
“Значи една од забелешките е дека во законот, и тоа е точно, намерно, свесно, не беа вградени методолошките елементи бидејќи методологија подразбира стручност дел од операцијата попис, а законот би требало да ја даде таа заонска рамка за спроведување на попис. Меѓутоа спремни сме да вградиме дел од методологијата во самиот закон, дефиницијата на таа категорија резидентно или вкупно население која што сите ја интерпретираат на секаков начин, да ги ставиме во законот белезите за кој што ќе се собираат податоци и уште некои ситни елементи за кои што, како го нарекоа, поимник, да ги дефинираме сите поими кои се вклучени во овој закон”, изјави Симовски.
Тој покажа спремност да се сретне и со претставници на другите парламентари партии и групи, со цел како што рече, да се слушнат сите страни и законот да биде поддржан од сите. Едиствена точка која остана уште нејасна и двете страни се на различни позиции, е барањето на ВМРО-ДПМНЕ за пописот да го реализира посебно тело, а не Заводот за Статистика, бидејќи, како што тврдат, без намера да го ценат професионализмот, директорот е избран од власта. А, според директорот на ДЗС оваа е едиствената институција која според актуелниот закон може да спроведе попис.
Илија Димовски возврати на тоа дека пописот уште не е донесен и дека е предмет на преговори и на промени.
Арбен Зеќири
