Во падот на рускиот авион во градот Јеиск загинаа најмалку 13 лица, меѓу кои три деца

Најмалку 13 лица, меѓу кои три деца, загинаа при уривањето на руски воен авион во градот Јеиск, на брегот на Азовското Море во Краснодарската област во Русија, соопшти руското Министерството за вонредни ситуации..

„Вкупниот број на жртви е 13, меѓу кои три деца, а 19 лица се повредени“, соопшти Министерството. При падот се запалила една станбена зграда, а евакуирано било и блиското училиште, јавуваат локалните медиуми. Министерство за одбрана соопшти дека ловецот-бомбардер Су-34 се урнал откако еден од неговите мотори се запалил за време на тренинг лет. Пилотите успеале да скокнат од леталото пред падот, се додава во соопштението.

Министерството за цивилна одбрана и вонредни ситуации на Краснодарската област соопшти дека пожарот во катната зграда во градот Јејск, каде се урна воен авион, е изгаснат.

„Пожарот во катната зграда е целосно изгаснат. Евакуирани се 250 луѓе, меѓу кои 40 деца. Сите се сместени во шест хотели и пансиони со капацитет од 500 легла“, се вели во соопштението.

Според извештаите на локалните медиуми, пожарот зафатил пет ката од повеќекатната зграда, а бил зафатен уште еден блок од таа зграда. Руските власти започнаа истрага и испратија истражители на местото на несреќата. Јеиск лежи на спротивната страна на Азовското Море од брегот на јужна Украина, кој беше окупиран од Русија во војната што започна во февруари. Јеиск се користи како база за обука на поморската авијација.